Trajneri i Barcelonës, Luis Enrique ka theksuar se do të gjejë një sistem që i përshtatet përforcimit të ri, Luis Suarez.

Ylli uruguaian ka bërë tri paraqitje për gjigantin katalan pas përfundimit të dënimit prej katër muaj moslojë, por ende nuk ka shënuar. Dy prej këtyre paraqitjeve përfunduan në humbje nga Real Madrid në El Clasico dhe në shtëpi nga Celta Vigo.

Enrique ka pranuar se ende nuk e ka gjetur formulën ideale për repartin e pasur sulmues.

“Ne kemi analizuar se si ta inkorporojmë Suarezin në formacionin bazë dhe jemi duke u munduar të gjejmë një zgjidhje. Messi, Neymar, Suarez, Munir dhe Pedro mund të luajnë në shumë pozita dhe ata të gjithë janë zgjidhje pozitive”, u shpreh Enrique.