Legjenda braziliane, Pele thotë se Neymar u përmirësua shumë, që prej se iu bashkua Barcelonës, duke e konsideruar sulmuesin si një gjeni të futbollit.

22 vjeçari iu bashkua gjigantit spanjoll nga Santosi verën e kaluar, duke realizuar 13 gola dhe duke dhuruar 11 asistime në La Liga dhe në Ligën e Kampionëve.

Ylli i ri pritet të jetë lojtari kryesor i Brazilit, në Botërorin që do të mbahet këtë muaj.

“Në vitin 1958, unë isha vetëm 17 vjeç dhe luajta vetëm në vendin tim. Neymar është 22 vjeç dhe ka eksperiencë, pasi luajti në Spanjë për një vit”, deklaroi Pele për “Times of India”.

“Koha ka ndryshuar tash. Kjo e ndihmon lojtarin të adaptohet në një stil ndryshe të futbollit. Ndiej se Neymar do të jetë lojtar më i mirë, pas transferimit në Barcelonë. Ai ka një talent të jashtëzakonshëm”, vazhdoi Pele.

“Dhe, ai ka aftësi ta marrë ekipin në duart e tij siç bëri në Kupën e Konfederatave. Ky djalosh është një gjeni i futbollit”, përfundoi 73 vjeçari.

Trajneri i fitnessit të Brazilit, Paulo Paixao e ka shprehur gëzimin e tij për zhvillimin fizik të vazhdueshëm të Neymarit, që prej lëvizjes së tij drejt Barcelonës, në vitin 2013.

Ish futbollisti i Santosit kishte arritur në qendrën stërvitore të Seleçaos, Granja Comary këtë javë, duke shfaqur shtim prej tre kilogramësh të masës muskulore, të cilën e ka arritur pas më pak se një viti që nga Kupa e Konfederatave.

“Neymar vazhdon të na japë besim. Ai nuk është përmirësuar vetëm fizikisht, por edhe në aspektin e eksperiencës, duke luajtur me Barcelonën”, deklaroi Paixao, i cili beson se 22 vjeçari është shëruar plotësisht nga lëndimi i këmbës, të cilin e kishte pësuar këtë sezon, teksa po luante me gjigantin katalunas.

“Sot ai ushtroi me lojtarët tjerë që luajnë në Evropë dhe ka shfaqur formë tjetër, e cila na jep besim të madh se ai do të japë edhe më shumë në Botëror”, vazhdoi Paixao.