Nuk është vetëm sistemi ligjor e kushtues i vendit që në bisedimet në Bruksel, po sfidon platformën e asaj që në marrëveshje është projektuar si Asociacioni i Komunave  Serbe në veri, sipas Marrëveshjes së arritur Kosovë –Serbi.

Me gjithë ndryshimet që po bëjnë vazhdimisht të dyja palët në planet e tyre  rreth Asociacionit, qëndrimet skajshmërisht të ndryshme kanë shtyrë palët,  sidomos atë kosovare që të kërkojnë  ndihmën e Bashkimit Europian, lehtësues në këtë proces, raporton Radio Kosova.

Burime brenda ekipit negociator kanë konfirmuar se ky lehtësim po kërkohet në formën e një propozimi të BE-së rreth Asociacionit, e që praktikisht ky propozim do ishte brenda materies që ka përcaktuar Konventa Evropiane për Vetëqeverisje Lokale.

Zëvendëskryeministrja e Kosovës Edita Tahiri, nuk ka dashur të jap sqarime rreth çështjes së Asociacionit dhe çfarë saktësisht është kërkuar nga BE.

Ndërsa sipas  përgjigjes që ka dhënë  Zyra e Bashkimit Evropian në Kosovë, BE duket se nuk po preferon të shtyj përpara propozimet e veta rreth asociacionit, por që të shtyj palët në bisedime të gjejnë  vetë një zgjidhje, të pranueshme dhe të qëndrueshme njëkohësisht.

“Ne nuk po i shtyjmë përpara propozimet tona, por po i inkurajojmë të dyja palët që ta arrijnë një marrëveshje të pranueshme për të dyja palët e cila mund të jetë e qëndrueshme”’, thuhet në një përgjigje përmes postës elektronike të  Zyrës së  Bashkimit Evropian në  Kosovë për Radio Kosovën.

Ajo që është konfirmuar është se tashmë  është  shty krijimi i Asociacionit të Komunave Serbe. Ka qenë Ministri i Kthimit, Dalibor Jevtic ai që së fundi ka konfirmuar se Asociacioni i Komunave serbe do të presë  deri pas zgjedhjeve të përgjithshme në Kosovë megjithëse nuk është caktuar ende data e këtyre zgjedhjeve.

Deri më tani beteja e të dyja palëve në bisedimet në Bruksel, është fokusuar në atë nëse Asociacioni i komunave serbe do të ketë përfaqësim ndërkombëtar dhe nëse  do të  ketë tiparet e një institucioni qeveritar që financohet nga  shteti serb dhe ai i Kosovës, raporton Radio Kosova.