Ekzistojnë shumë arsye pse Cesc Fabregas mund të largohet nga Barcelona, tri vjet pas rikthimit në klub.

E para, dhe ndoshta më kryesorja, mesfushori nuk ka garanci se do të jetë titullar në projektin e ri të ekipit me trajnerin Luis Enrique, shkruan El Mundo Deportivo. Për më tepër, futbolli anglez i përshtatet më së tepërmi karakteristikave të tij.

Dhe, pikërisht kjo ka bërë që edhe reprezentuesi spanjoll të mos e kundërshtojë mundësinë e rikthimit në Premierligë, ku do të ketë rol më të madh për të luajtur se sa në Barcelonën e re të Enriques.

Nga një këndvështrim tjetër, Fabregas dhe gruaja e tij Daniella Semaan kanë dy fëmijë, dhe kanë kaluar shumë vjet së bashku në Londër, ku mesfushori ishte pjesë e Arsenalit gjatë periudhës 2003-2011.

Derisa Arsenali nuk duket i interesuar për rikthimin e tij, Chelsea, tjetër klub nga Londra, duket se tenton blerjen e tij nga Camp Nou.