Menaxheri i Arsenalit, Arsene Wenger është në kërkim të përforcimeve të reja gjatë këtij afati kalimtar të verës.

Një prej reparteve ku strategu francez synon të ndërhyjë më së tepërmi është reparti ofanziv. Dhe, pikërisht Olivier Giroud ka pranuar se gjiganti londinez ka nevojë për një sulmues të ri.

“Përforcimet për sezonin e ardhshëm? Kemi nevojë për një sulmues”, deklaroi shkurt Giroud për ‘InfoSport+”.

Në javët e fundit kanë filluar të qarkullojnë spekulime se Arsenali është i interesuar për transferimin e sulmuesit të Milanit, Mario Balotelli i cili thuhet se nuk do të mbetet në San Siro pas emërimit të Filippo Inzaghit në postin e trajnerit.

Por, Wengerit i pëlqen edhe sulmuesi i ri i Real Madridit, Alvaro Morata i cili ka konfirmuar se do të largohet nga Santiago Bernabeu.