Gjithsej 25 vullnetarët amerikanë vijnë nga komunitete nga e gjithë SHBA-të dhe janë të përkushtuar të shërbejnë si mësues të gjuhës angleze nëpër shkollat e mesme të Kosovës.

Ambasadorja e SHBA-ve në Kosovë, Tracey Ann Jacobson, së bashku me Drejtorin e Korpusit të Paqes për Kosovën, Stephen Kutzy, dhe Drejtoreshën e misionit të USAID-it, Maureen Shauket, kanë dalë në aeroportin “Adem Jashari” për t’i mirëpritur vullnetarët.

“Krenohem shumë që mirëpres vullnetarët e parë të Korpusit të Paqes në Kosovë”, tha ambasadorja Jacobson.

“Korpusi i Paqes pasqyron shumë vlera të cilat gjenden në thelbin e jetës amerikane, përfshirë këtu edhe rëndësinë u vullnetarizmit dhe shërbimit për të tjerët. Pres të shoh kontributet e rëndësishme që e di se vullnetarët janë në gjendje t’i japin në komunitetet e tyre. Shërbimi i tyre do të forcojë lidhjen e miqësisë mes shteteve tona për vitet që vijnë”.

“Hapja e një programi të ri të Korpusit të Paqes është një nder i vërtetë dhe ne jemi të kënaqur që Kosova është bërë shteti i 140-të në historinë e shërbimit të Korpusit të paqes”, tha Drejtori i Korpusit të Paqes për Kosovën, Kutzy.

“Vullnetarët janë këtu për t’u angazhuar me komunitetet e Kosovës në nivel lokal. Ata do të punojnë shumë që të mësojnë zakonet e Kosovës dhe të mësojnë gjuhët lokale, dhe të ndajnë shkathtësitë dhe të zhvillojnë projekte që merren me nevojat e komuniteteve të tyre nikoqire. I jemi mirënjohës popullit të Kosovës për mikpritjen e shkëlqyeshme dhe partneritetin”, tha ai.

Korpusi i Paqes filloi programin e tij të parë në Kosovë me ftesë të Presidentes Atifete Jahjaga, e cila formalisht nënshkroi një marrëveshje shtetërore me zyrtarë të Korpusit të Paqes në shtator të vitit 2013.

Para se të shkojnë në pikat e tyre të shërbimit vullnetarët do të aftësohen për tre muaj në mënyrë gjithëpërfshirëse për aspektet ndërkulturore, gjuhësore, dhe teknike.

Vullnetarët inkurajohen poashtu që të marrin pjesë në projektet e komunitetit dhe shkollave të cilat ofrojnë mundësi për të shkëmbyer përvojat, transferuar shkathtësitë dhe dijen, dhe për të ndërtuar mirëkuptim më të madh mes vullnetarëve dhe komuniteteve nikoqire.

Korpusin e Paqes e ka themeluar Presidenti John F. Kennedy, me anë të një urdhri ekzekutiv me 11 mars 1961, dhe prej atëherë më shumë se 215,000 amerikanë kanë shërbyer në 140 shtete nikoqire.

Vullnetarët e Korpusit të Paqes duhet të jenë shtetas të SHBA-ve dhe mbi 18 vjeç.

Shërbimi në Korpusin e Paqes është një angazhim 27-mujor dhe misioni i agjencisë është që të promovojë paqen dhe miqësinë botërore dhe të kuptuarit më të mirë mes amerikanëve dhe popujve të shteteve tjera.