Në operacionin e parë policor të realizuar në rajonin e Prizrenit me datë  09/09/2015, pas një pune hetimore-operacionale janë arrestuar tre (3) persona të dyshuar për të cilët dyshohet se të njëjtit kanë kryer veprën penale “trafikimit me njerëz”, raporton lajmi.net.

Personat e arrestuar janë: S. K i  lindur më 1963, mashkull kosovar,  R. K  lindur më  1957 mashkull kosovar, SH. B   lindur më 1970, femër kosovare, ndërsa viktimat e identifikuara nga policia janë shtetase të Kosovës (femra/të mitura) të cilat  janë duke u trajtuar sipas procedurave standarde  për ndihmë dhe mbrojtje të viktimave.

Gjatë këtij operacioni si prova materiale janë sekuestruar: Një Veturë, një armë (revole) me gaz, një jelekë antiplumb, një kompjuter, një ZD memorie e kamerës, 1189 euro , dy pasaporta, libra dhe fatura të ndryshme.

Ndërsa sa i përket operacionit të dytë, me datë 09.09.2015 në rajonin e Prishtinës, pas hetimeve paraprake janë arrestuar pesë (5) persona të dyshuar me dyshimin e bazuar se kanë kryer veprën penale të mundësimit ose detyrimit në prostitucion dhe marrje me prostitucion.

Gjatë këtij operacioni janë arrestuar këta persona: N. S  lindur më 1976, femër kosovare, A. F lindur më 1968, mashkull kosovar, A. S lindur më 1968, femër kosovare, M. M lindur më 1961, mashkull kosovar, A. B lindur më 1994, femër kosovare.

Sipas policisë, të gjitha veprimet policore janë kryer me autorizimin e Prokurorëve përkatës dhe në të dy rastet ndaj pesë (5) personave tanimë të arrestuar është caktuar masa e ndalimit për 48 orë, për procedurat tjera hetimore, kurse tre (3) persona  janë liruar në procedurë të rregullt./lajmi.net