Massimiliano Allegri ka dhënë disa komente pas fitores së Juventus ndaj Inter.

Skuadra e Juventus ka mposhtur Interin 2:0, në një ndeshje që mund të shërbejë si pikë kthyese për skuadrën ‘Biankoneri’.

Pas ndeshjes, Massimiliano Allegri ka dhënë komentet e tij, duke u shprehur i kënaqur por duke thënë se sezoni është i gjatë.

“Ishte fantastike të shikoje këtë lojë, veçanërisht pasi ishim pak me fat në pjesën e parë, por kur ke një qëndrim proaktiv dhe punon për shokun tënd të skuadrës, ka më shumë gjasa të marrësh një rezultat pozitiv”, tha Allegri për DAZN, përcjell lajmi.net. “Sistemi i ka dhënë skuadrës më shumë stabilitet, por më e rëndësishmja është që skuadra të punojë së bashku, të mbrohet pas topit, të kuptojë se kur është koha për të vuajtur dhe se ajo mund të zgjasë 95 minuta. Në fillim të sezonit do të luanim rreth 30 minuta dhe më pas sikur dorëzoheshim, por ne jemi rrugës tani, edhe në momente të vështira. Ky është një hap i rëndësishëm”, shtoi trajneri i Juves.

“Sezoni është i gjatë, ne patëm disa probleme, mbi të gjitha në Ligën e Kampionëve. Ka gëzim për të mposhtur një skuadër të madhe si Interi, por atëherë ne duhet menjëherë të kthejmë fokusin për dy ndeshjet e ardhshme dhe në atë pikë mund të tërheqim një vijë nën 2022”, ishin fjalët e italianit.

Juventus me këtë fitore arrin ta tejkalojë Interin në renditjen tabelore, duke numëruar një pikë më shumë sesa ‘Zikaltërit’. /Lajmi.net/