Adriano rikthehet në qendër të vëmendjes, por edhe njëherë tjetër me ndonjë veprim që nuk ka të bëjë me detyrën e tij si futbollist.

Sipas medieve braziliane, sulmuesi i mirënjohur i cili është duke u munduar të ringjall karrierën e tij tek skuadra Atletico Paranaense, ka shkaktuar një kacafytje në një diskotekë në Rio de Janeiro.

Sigurimi i lokalit e largoi Adrianon – në gjendje t dehur – i cili ishte i shoqëruar nga këngëtari Thiaguinho. Futbollistët e tjerë të Atletico Paranaense janë paraqitur në stërvitje por ai jo.

Përfaqësuesit e tij kanë njoftuar se Adriano ka marrë leje nga klubi që të pushojë deri të hënën por presidenti i Atletico Paranaense, Mario Celso Petraglia ka theksuar se futbollisti “ka pësuar një ngjarje të keqe, është djalosh shumë lehtë i thyeshëm nga aspekti emocional”.