Në një ngjarje të rëndësishme për sportin kosovar, sot u vendos gurthemeli i stadiumit të ri në Suharekë, një projekt që synon të transformojë infrastrukturën sportive në këtë komunë.

Të pranishëm në ceremoninë e vendosjes ishin kryeministri në detyrë Albin Kurti, ministri në detyrë i Kulturës, Rinisë dhe Sportit Hajrulla Çeku, kryetari i Komunës së Suharekës Bali Muharremaj dhe kryetari i Federatës së Futbollit të Kosovës, Agim Ademi, transmeton lajmi.net.

Sipas Ademit, ky është një “moment historik për sportin dhe gjithë qytetarët e Suharekës”, pasi projekti i stadiumit përmbush standardet e kategorisë 2+ të UEFA-s dhe përfshin 6,583 ulëse. Stadiumi pritet të përfundohet për 750 ditë nga dita e sotme.

Drejtori i departamentit të sportit në MKRS, Ibër Alaj, prezantoi projektin teknik, duke theksuar standardet moderne që do të ofrojë ky impiant për futbollin vendor.

Ademi, në fjalën e tij, përgëzoi klubet e futbollit FC Ballkani, FC Suhareka, si dhe të gjitha ekipet e tjera të meshkujve dhe femrave nga kjo komunë, që do të përfitojnë nga ky investim madhor.

“Ky stadium do të jetë një qendër e re e futbollit, por edhe e krenarisë për gjeneratat e ardhshme,” u shpreh Ademi.

Stadiumi pritet të shërbejë si shtëpi e re për skuadra që tashmë përfaqësojnë Kosovën në arenën ndërkombëtare, siç është FC Ballkani, si dhe të nxisë zhvillimin e sportit në nivel lokal.

Postimi i plotë: