Policia belge ka arrestuar sot tre persona, përfshirë ish-shefen e diplomacisë së BE-së Federica Mogherini, dhe ka bastisur selinë e shërbimit të jashtëm të BE-së si edhe Kolegjin elitë të Evropës, në kuadër të një hetimi për dyshime për mashtrim.

Të tre të ndaluarit u arrestuan “si pjesë e një hetimi për dyshime për mashtrim të lidhur me trajnime të financuara nga BE-ja për diplomatët e rinj”, tha Zyra e Prokurorit Publik Evropian (EPPO) në një deklaratë, pa përmendur emra.

Gazeta belge De Standaard, duke cituar burime gjyqësore, ishte ndër të parat që raportoi se Mogherini, aktualisht rektore e Kolegjit të Evropës, ishte ndër të arrestuarit.

Sipas kësaj gazete, dy persona të tjerë nga “rrethet diplomatike” ishin arrestuar për dyshime për “mashtrim në tendera, korrupsion dhe konflikt interesi”. Kolegjit të Evropës nuk iu përgjigj menjëherë një kërkese për koment.

Siç raporton “The Guardian” Stefano Sannino, sekretari i përgjithshëm i shërbimit të veprimit të jashtëm të BE-së nga 2021 deri në 2024 dhe aktualisht drejtor i përgjithshëm në Komisionin Evropian, ishte një tjetër prej të arrestuarve. Mediat belge raportuan gjithashtu emrin e tij.

Një zëdhënës i Komisionit Evropian konfirmoi se “po zhvillohet një hetim i vazhdueshëm mbi aktivitete që kanë ndodhur gjatë mandatit të mëparshëm”, por refuzoi të jepte detaje të tjera, përfshirë emrat e të dyshuarve, përcjell Reporteri.net.

Kolegji i Evropës nuk iu përgjigj pyetjes nëse Mogherini ishte arrestuar, por tha se do të bashkëpunonte plotësisht me autoritetet “në interes të transparencës dhe respektimit të procesit hetimor”. Ai tha se mbetet i përkushtuar ndaj “standardeve më të larta të integritetit, drejtësisë dhe përputhshmërisë – si në çështjet akademike ashtu edhe në ato administrative”.

Policia kreu kontrolle në selinë e Shërbimit Evropian të Veprimit të Jashtëm (EEAS) në Bruksel, si dhe në disa ndërtesa të Kolegjit të Evropës në Bryzh, me kërkesë të prokurorisë. Kontrollet u kryen edhe në shtëpitë e të dyshuarve, tha zyra e prokurorit.

Ajo tha se hetimet janë në vazhdim “për të vlerësuar nëse janë kryer ndonjë vepër penale”, duke shtuar: “Të gjitha personat janë të pafajshëm deri sa të provohet e kundërta nga gjykatat kompetente belge.”

Shërbimi i jashtëm i BE-së u drejtua nga Mogherini nga viti 2014 deri në 2019, pasi ajo kishte shërbyer disa muaj si ministre e jashtme e Italisë. Ajo u bë rektore e Kolegjit të Evropës në 2020, një zgjedhje e diskutueshme për disa ish-studentë, të cilët pretendonin se ajo mungonte në kredenciale akademike ose përvojë në drejtimin e një strukture të ndërlikuar akademike. Kolegji i Evropës, i themeluar në 1949 në Bryzh, ka shërbyer si qendër pasuniversitare për formimin e shumë zyrtarëve dhe diplomatëve të BE-së.

Rasti përfaqëson një hetim të paprecedentë nga EPPO, e vetmja strukturë e BE-së që trajton çështje penale, e cila u krijua në vitin 2021 për të luftuar mashtrimet ndërkufitare që përfshijnë fondet e BE-së. EPPO mund të çojë çështje penale në gjykatat e 24 shteteve anëtare që janë pjesë e saj, përfshirë Belgjikën.

Çështja fokusohet në atë nëse Kolegji i Evropës ose përfaqësues të tij janë informuar paraprakisht për një tender për një program trajnimi për diplomatët e rinj, para hapjes zyrtare të procesit të ofertimit.

EPPO tha se kishte “dyshime të forta” se rregullat për konkurrencë të drejtë janë shkelur dhe se informacion konfidencial ishte shpërndarë me njërin prej kandidatëve në tender. Kolegji i Evropës në Bryzh u shpërblye me një kontratë për të drejtuar Akademinë Diplomatike të Bashkimit Evropian për vitet 2021–22, pas një vendimi nga shërbimi i jashtëm i BE-së. EPPO tha se imuniteti i tre të dyshuarve ishte hequr me kërkesën e saj.

EPPO refuzoi të jepte detaje të tjera përtej deklaratës fillestare “për të mos rrezikuar procedurat në vazhdim dhe rezultatin e tyre”.

Një diplomat i BE-së tha se ishte i kënaqur që EPPO “po punon dhe nuk ka frikë të shkojë pas emrave të mëdhenj”, duke shtuar: “Nëse akuzat janë të vërteta, ata duhet të ndëshkohen rëndë për të dhënë një sinjal të qartë se çdo lloj korrupsioni është i patolerueshëm në BE.”