Kandidati për Kryetar të Komunës së Lipjanit nga Aleanca për Lipjanin, Basri Demiri, ka garantuar elektoratin lipjanas se nëse i besohet atij mandati për ta udhëhequr këtë komunë gjatë 4 viteve të  ardhshme, do të krijojë 4500 vende të reja pune.

Sipas tij, ky synim do të arrihet duke e fokusuar programin e tij në krijimin e klimës së përshtatshme për joshje të investitorëve të jashtëm.

Demiri ka premtuar se në mandatin e tij 4 vjeçar komunës së Lipjanit do t’i shtohen së paku 12 fabrika të mëdha si fabrika e këpucës, fabrika e përpunimit të lëkurës, fabrika e drurit, dhe të subvencionohen bizneset e vogla e të mesme të cilat veprojnë në këtë Komunë.

“Në mandatin tim 4 vjeçar joshja e investitorëve të huaj, investitorët nga mërgata dhe subvencionimi i bizneseve të vogla janë ndër prioritetet kryesore në të cilat e kemi bazuar zhvillimin ekonomik dhe krijimin e vendeve të reja të punës”, është shprehur Demiri.

Demiri ka shtuar se gjatë qeverisjes së tij 4 vjeçare po ashtu prioritet të veçantë do t’i kushtojë edhe bujqësisë, zhvillimit të arsimit, kulturës, rinisë dhe sportit.

Në garën për Kryetar të Lipjanit, aleanca e Basri Demirit është duke u mbështetur edhe nga Aleanca Kosova e Re e Behgjet Pacollit.