Pas 238 ditësh mungese, Iker Casillas sonte do të kthehet në formacionin bazë të Real Madridit në duelin në udhëtim te Galatasaray në kuadër të Grupit B të Ligës së Kampionëve.

Ikona e gjigantit spanjoll humbi statusin e titullarit pas lëndimit që pësoi në pjesën e dytë të sezonit të kaluar kur ish trajneri Jose Mourinho e angazhoi Diego Lopezin dhe ia besoi atij portën deri në fund të edicionit.

Mourinho u largua drejt Chelseat dhe në vend të tij erdhi Carlo Ancelotti, por statusi i Casillasit nuk ndryshoi. Ai ka qenë rezervist në secilën prej katër ndeshjeve të para në edicionin e ri të La Ligës, por italiani ka njoftuar se do ta aktivizojë atë nga minuta e parë në përballjen kundër Galatasarayt.

Dhe, nëse paraqitet mirë ai do të vazhdojë me këtë politikë, Casillas do të mbrojë në Ligën e Kampionëve kurse Lopez në La Ligë.