Policia e Kosovës, përkatësisht Drejtoria për Hetimin e Krimeve Ekonomike dhe Korrupsionit, në bashkëpunim me autoritetet austriake, ka zhvilluar një operacion policor në kuadër të hetimeve për vepra të dyshuara penale të kryera në Vjenë.

Hetimet janë realizuar mbi bazën e autorizimit të lëshuar nga Prokuroria Themelore në Prishtinë, pas një kërkese të ardhur nga autoritetet e Austrisë përmes mekanizmit të Ndihmës Juridike Ndërkombëtare. Nën hetim janë dy shtetas meshkuj kosovarë, të dyshuar për përfshirje në aktivitete kriminale në kryeqytetin austriak, transmeton lajmi.net.

Më 5 maj 2026, njësitë policore kanë zhvilluar kontrolle në tri lokacione të ndryshme në Fushë Kosovë. Në këtë operacion kanë marrë pjesë edhe hetues nga Austria, duke reflektuar nivelin e bashkëpunimit ndërkombëtar në luftimin e krimit ekonomik dhe korrupsionit.

Autoritetet kanë bërë të ditur se rasti mbetet në fazën e hetimeve, me fokus në identifikimin e aseteve dhe çdo përfitimi pasuror që dyshohet se është siguruar përmes veprimtarisë kriminale.

Ky aksion konsiderohet si dëshmi e përkushtimit të institucioneve të rendit për të forcuar sundimin e ligjit dhe për të intensifikuar bashkëpunimin ndërkombëtar në ndjekjen e krimeve që tejkalojnë kufijtë shtetërorë.

Komunikata e plotë: 

Policia e Kosovës, respektivisht Drejtoria për Hetimin e Krimeve Ekonomike dhe Korrupsionit, e mbështetur edhe nga njësitë relevante policore ka zhvilluar hetimet bazuar ne autorizimin e lëshuar nga P.TH Prishtinë , e cila është bazuar në kërkesën nga autoritetet Austriake përmes Ndihmës Juridike Ndërkombëtare – NJN, ndaj dy të dyshuarve meshkuj kosovarë nën dyshimin për kryerje të veprave të ndryshme penale në kryeqytetin e Austrisë – Vjenë.

Pas ndërmarrjes së veprimeve hetimore, me datën 05.05.2026 është zhvilluar një operacion policor ku janë realizuar kontrolle në tri lokacione të ndryshme në Fushë Kosovë në të cilin kanë marrë pjesë edhe hetues nga shteti i Austrisë.

Rasti vazhdon të mbetet nën hetim në drejtim të identifikimit të aseteve apo çfarëdo lloj dobie pasurore që mund të jetë në posedim të të dyshuarve dhe e cila dyshohet të jetë përfituar me aktivitet kriminal.

Ky angazhim konfirmon profesionalizmin dhe besueshmërinë e Policisë së Kosovës në bashkëpunimin ndërkombëtar, duke forcuar luftën kundër krimit dhe sundimin e ligjit përtej kufijve./lajmi.net/