Një kompani amerikane teknologjike e ka suspenduar drejtorin e saj ekzekutiv pasi një përqafim në ekranin e madh në një koncert të Coldplay – që përflitet se përfshin dy nga punonjësit e saj – u bë viral.

Në klip, i cili fillimisht u shfaq në një ekran gjigant në koncertin që u mbajt në Boston, shihen dy persona me krahët e mbështjellë rreth njëri-tjetrit.

Kur fytyrat e tyre shfaqen për t’u parë nga mijëra njerëz, burri dhe gruaja përkulen papritur dhe fshihen nga kamera.

Raportet se të dy janë drejtues në kompaninë Astronomer dhe thashethemet për një aferë që u shkaktuan nga komenti i liderit të grupit, më pas u përhapën në internet. Të premten vonë, kompania konfirmoi në X se drejtori i saj ekzekutiv Andy Byron ishte lënë me pushim.

Videoja e dyshes, pastaj duke u përpjekur shpejt të fshihej, shpërtheu në internet pas koncertit të mërkurën në mbrëmje, shkruan BBC.

Chris Martin, këngëtari kryesor i Coldplay, pasi pa dyshen të fshiheshin, i tha turmës: “Ose kanë një aferë, ose janë thjesht shumë të turpshëm”.

Videoja fillestare e postuar në TikTok mori miliona shikime. Më pas u nda në platforma të ndryshme, u shndërrua në meme dhe me të u tall në programe televizive.

Dy ditë pasi interneti u mbush me thashetheme rreth përqafimit, Astronomer publikoi një deklaratë duke njoftuar një hetim për çështjen, pa specifikuar videon.

“Astronomer është i përkushtuar ndaj vlerave dhe kulturës që na kanë udhëhequr që nga themelimi ynë”, thuhej në deklaratë.

“Udhëheqësit tanë pritet të vendosin standardin si në sjellje ashtu edhe në llogaridhënie. Bordi i Drejtorëve ka filluar një hetim formal për këtë çështje dhe do të kemi detaje shtesë për të ndarë shumë shpejt”.

Bashkëthemeluesi dhe drejtori kryesor i produkteve Pete DeJoy është emëruar Drejtor Ekzekutiv i përkohshëm.

Burri në video përflitet në raporte të shumta se është Drejtori Ekzekutiv i Astronomer, Andy Byron, i cili ka qenë në kompani që nga korriku 2023. Vetë Byron nuk e ka konfirmuar identitetin e tij në video.

Gruaja u identifikua në internet si Kristin Cabot, drejtoresha e personelit të kompanisë, e cila ka qenë me Astronomer që nga nëntori 2024. Ajo gjithashtu nuk e ka konfirmuar identitetin e saj.

BBC nuk ka qenë në gjendje të konfirmojë identitetin e personave në video.

Deklarata e lëshuar nga kompania Astronom shtoi se Byron nuk kishte lëshuar një deklaratë personale dhe se raportimet që thoshin të kundërtën ishin të pasakta. Gjithashtu tha se nuk kishte punonjës të tjerë në video.

Deklarata kinse e lëshuar nga Byron u bë virale të enjten.