Trajneri i Dritës, Akis Vavalis ka folur në një konferencë për media në prag të ndeshjes kundër Ballkanit, e vlefshme për javën e 12-të kampionale.

Ballkani dhe Drita do të përballen në stadiumin e qytetit në Suharekë nga ora 13:00, shkruan lajmi.net.

“Timonieri” grek vlerësoi Ballkanin para ndeshjes duke thënë se luajnë dy ekipet më të mira në Superligë.

“Siç e dini ndeshje derbi dhe luajmë kundër një ekipi shumë të mirë, luajnë dy skuadrat më të mira në Superligë. Vijmë nga një barazim, por fatmirsisht vjen menjëherë nesër dhe mund ta dëshmojmë duke rikuperuar pikët. Nuk kemi pasur shumë kohë për t’u përgatitur, por në derbi të tillë luan pasioni dhe motivi për ta fituar atë”, ka thënë Vavalis në konferencë për media.

Vavalis theksoi se nëse Drita jep 100 për qindshin, mund ta mposht Ballkanin.

“Jam i bindur se do të tregojmë një lojë të mirë nëse japim 100 për qindshin tonë dhe mund të fitojmë. Është derbi dhe çkado mund të ndodhë, por unë do vazhdojë të besoj në djemtë tanë. Të jemi agresiv dhe kompetitiv nga fillimi i ndeshjes deri në fund. Besoj se do të mund të rikthehemi”, deklaroi trajneri grek.

Ballkani ka 26 pikë në pozitën e parë, ndërkohë Drita zë vendin e dytë me katër pikë më pak./Lajmi.net/