“Rajonet lindore të qytetit janë granatuar. Janë qëlluar një autobus, një shitore dhe disa objekte banesore”, deklaroi ky zyrtar rajonal.

Agjencia ruse e lajmeve RIA Novosti transmeton komunikatën e këshillit të qytetit të Lluhanskut, duke raportuar se gjatw granatimit intensiv të lagjeve lindore janë vrarë shumë civilë.

Sipas kësaj komunikate, në Lluhansk tash e 12 ditë nuk ka energji elektrike, as ujë, lidhje telefonike, kurse edhe shumë shitore e banka nuk punojnë.

Raportohet po ashtu se dy civilë janë vrarë edhe në lagjen Kujbishevsk të qytetit Donjeck, përderisa Kievi njofton se gjatë 24 orëve të fundit janë vrarë 9 dhe janë plagosur 18 pjesëtarë të forcave të sigurisë së Ukrainës.  

Forcat pro-ruse në Donjeck njoftojnë se gjatë tri ditëve të fundit në këtë qytet janë vrarë 74 persona, kurse 116 të tjerë janë plagosur.

Gjithsej, që nga 1 marsi në këtë qytet janë vrarë 839 persona, si dhe janë plagosur 1,623 të tjerë.

Forcat e sigurisë së Ukrainës janë duke bërë përpjekje për të rikthyer nën sovranitetin e saj Ukrainën lindore dhe dy qytetet më të mëdha atje, Lluhansk e Donjeck.