Komuna e Prishtinës, ka mbetur vonë për nga dekorimet që do të duhej të vendoseshin në sheshet e kryeqytetit për shkak të festave të fundvitit.

Edhe 15 ditë kanë mbetur nga festa e Vitit të Ri, ndërkaq sheshet e Prishtinës ende janë pa “atmosferë festive”, shkruan lajmi.net.

Komuna e Prishtinës, i ka dhënë tender të negociuar prej 97 mijë euro operatorit ekonomik, Te Fatosi Sh.P.K.

Për këtë tender, kanë aplikuar edhe dy kompani të tjera, që nuk kanë arritur ta fitojnë për shkak të ofertës me çmim më të lartë.

Vonesat në vendosjen e dekoreve për fundvit, kanë ardhur pas problemeve buxhetore me të cilat përballej kryeqyteti, por edhe pasi OSHP ia kishte anuluar aktivitetin e prokurimit.

“Lidhur me aktivitetin e prokurimit për dekorimet verore, dimërore dhe shënimi i datave me rëndësi, ju njoftoj se ky aktivitet i prokurimit paraprakisht është anuluar me vendim të OSHP-së. Tutje Komuna e Prishtinës e ka ritenderuar aktivitetin e prokurimit dhe aktualisht procedura ndodhet në fazën e vlerësimit të ofertave nga komisioni i rivlerësimit”, kanë thënë nga prokurimi për lajmi.net.

Në kryeqytet, tanimë vetem se ka filluar festivali tradicional “Verë n’dimër”, i cili organizohet për vite me radhe dhe mbledh shumë vizitorë nga qytete të ndryshme të Kosovës dhe më gjerë. /Lajmi.net/