Zyba për aferën e ryshfetit sulmon mediat: Liburn Aliu nuk shantazhohet

Deputeti i Lëvizjes Vetëvendosje, Salih Zyba ka folur rreth raportimeve të mediave në vend për aferë korruptive në Ministrinë e Infrastrukturës.

Lajme

02/06/2022 18:45

Sipas tij, kjo është një përpjekje e dështuar për të shantazhuar këdo qoftë.

“I vetmi element që nuk mohohet apo dëshmohet mund të jetë afërsia familjare më këdo që është bërë fjale, ajo nuk mund të mohohet se është diçka biologjike dhe e natyrshme. A secili trillim në emër të asaj lidhje që thash fillon me ministrin shkon te këshilltari dhe përfundon te një zyrtar që është nëpunës civil dhe që ka për detyrë me mbikëqyr një kontratë. Secili shikues apo dëgjues i këtij komentimi e ka parasysh që ka qenë një përpjekje e dështuar për të shantazhuar këdo qoftë”, ka deklaruar ai në emsionin “Ditari” në Tëvë1.

Zyba thotë se ministri i Infrastrukturës, Liburn Aliu nuk shantazhohet dhe kjo sipas tij është dëshmuar, teksa shprehet se në lidhje me rastin dyshimet janë ngritur po nuk ka asgjë për t’u vërtetuar.

“Konsideroj që Liburn Aliu në masën po flas edhe për Qeverinë nuk shantazhohet dhe është dëshmuar deri tash. Hetimet e Prokurorisë janë të nevojshme për shkak të situatës në opinion, por jo për shkak të dyshimeve që ndjej unë apo pjesa e konsiderueshme e LVV-së. Dyshimet janë ngritur por nuk ka për t’u vërtetuar asgjë”, ka thënë ai.

Dje është publikuar një audio-incizim në të cilin pretendohet se njerëz të afërt të ministrit të Infrastrukturës, Liburn Aliut, përfshihen në një aferë korruptive. Bëhet fjalë konkretisht për dajtë e këshilltarit të tij, Floren Ramqaj.