Mesazh “kristal” i qartë nga Gjermania: Nëse nuk ka pjesëmarrje në zgjedhje, nuk ka as Asociacion

Gjermania e ka bërë të qartë sot se pa pjesëmarrjen e serbëve të Kosovës në zgjedhjet lokale të parakohshme që do të mbahen në katër komunat në veri të vendit, nuk do të ketë krijim të Asociacionit. Një deklarim të tillë e ka bërë në Beograd, Carsten Meyer-Wiefhausen,  Zëvendës shefi i misionit të ambasadës gjermane…

Lajme

22/03/2023 18:56

Gjermania e ka bërë të qartë sot se pa pjesëmarrjen e serbëve të Kosovës në zgjedhjet lokale të parakohshme që do të mbahen në katër komunat në veri të vendit, nuk do të ketë krijim të Asociacionit. Një deklarim të tillë e ka bërë në Beograd, Carsten Meyer-Wiefhausen,  Zëvendës shefi i misionit të ambasadës gjermane në shtetin fqinj.

Siç raportojnë mediat në Serbi, Meyer-Wiefhausen e ka sqaruar se formimi i Asociacionit të Komunave me Shumicë Serbe, nuk është i mundur, nëse listat e kandidatëve për zgjedhjet lokale që Kosova planifikon t’i mbajë në katër komuna në veri të Kosovës, nuk janë dorëzuar.

Siç raporton agjencia e lajmeve “Beta”, Carsten Meyer-Wiefhausen citohet të ketë deklaruar se; “kjo është një çështje krejtësisht praktike”.

I pyetur për pasojat e mundshme nëse listat e kandidatëve nuk dorëzohen brenda afatit, në panelin e diskutimit , ai ka thënë se -“nëse nuk keni zyrtarë, kryetarë komunash, nuk mund të krijoni një komunitet komunash”.

“Pa njerëz në to, nuk keni institucione”, ka thënë ai.

“Ju duhen ato institucione. Kaq e thjeshtë është”, është shprehur diplomati gjerman.

Ndërkohë, afati i caktuar nga Komisioni Qendror i Zgjedhjeve i Kosovës për aplikimin e kandidatëve për zgjedhjet që planifikohen të mbahen në katër komuna në veri të Kosovës në fund të muajit prill, ka skaduar sot.

Lista Serbe nuk ka paraqitur listën e kandidatëve dhe për rrjedhojë ajo nuk do të marrë pjesë në zgjedhje.

Arsyetimi i tyre është se ata do t’I bojkotojnë zgjedhjet derisa të gjitha njësitë speciale të Kosovës të tërhiqen nga ajo zonë dhe të mos formohet Asociacioni.

Diplomati gjerman, Meyer-Wiefhausen, këto deklarime I ka bërë në një debat të mbajtur në Beograd me temën: “Asgjë në mes – Propozimi evropian për normalizimin e marrëdhënieve ndërmjet Beogradit dhe Prishtinës”.

Siç transmeton RTK, ky debat u organizua nga Lëvizja Evropiane në Serbi dhe Fondacioni Friedrich Ebert.