AGK i reagon Kurtit për deklaratat e tij për mediat: Përpjekje serioze për ndikim qeveritar në punën e tyre
Kryeministri në detyrë i Kosovës, Albin Kurti ka ”kritikuar” sot punën e mediave në Kosovë, duke sulmuar drejpërdrejt ato. Ai iu ka ofruar ‘trajnime’ dhe ‘kurse’ për media nga Qeveria, shkruan lajmi.net. Ndaj kësaj deklarate ka reaguar Asociacioni i Gazetarëve të Kosovës, të cilët kanë thënë se kjo është ‘përpjekje serioze për ndikim qeveritar në…
Lajme
Kryeministri në detyrë i Kosovës, Albin Kurti ka ”kritikuar” sot punën e mediave në Kosovë, duke sulmuar drejpërdrejt ato.
Ai iu ka ofruar ‘trajnime’ dhe ‘kurse’ për media nga Qeveria, shkruan lajmi.net.
Ndaj kësaj deklarate ka reaguar Asociacioni i Gazetarëve të Kosovës, të cilët kanë thënë se kjo është ‘përpjekje serioze për ndikim qeveritar në punën e mediave dhe tendencë për të vënë në pikëpyetje profesionalizimin e mediave kosovare”.
”Kryeministri në detyrë Kurti nuk ka përmendur miratimin e ligjit anti-kushtetues për Komisionin e Pavarur të Medieve, ndikimin politik të partisë së tij në Transmetuesin Publik, RTK dhe as fushatën e vazhdueshme të përdorimit të gjuhës nxitëse dhe të urrejtjes ndaj gazetarëve dhe mediave, nga zyrtarë të partisë së tij”, ka shkruar AGK.
Komunikata e plotë e AGK-së:
AGK: Për keqardhje deklaratat e kryeministrit në detyrë Kurti rreth raportit të Reporterëve pa Kufij
Asociacioni i Gazetarëve të Kosovës shpeh zhgënjim të thellë me qasjen e kryeministrit në detyrë, Albin Kurti, një javë pas publikimit të raportit për Kosovën të “Reporterëve pa Kufij”.
Në një fjalim gjatë një tubimi të partisë së tij, Kurti ka dështuar të adresojë gjetjet e raportit, duke fajësuar mediat dhe gazetarët për renditjen në vendin 99.
Kurti ka ofruar “trajnime dhe kurse nga Qeveria për gazetarë dhe media”, që është një përpjekje serioze e e papranueshme për ndikim qeveritar në punën e tyre, dhe tendencë për të vënë në pikëpyetje profesionalizimin e mediave kosovare.
Kryeministri në detyrë Kurti nuk ka përmendur miratimin e ligjit anti-kushtetues për Komisionin e Pavarur të Medieve, ndikimin politik të partisë së tij në Transmetuesin Publik, RTK dhe as fushatën e vazhdueshme të përdorimit të gjuhës nxitëse dhe të urrejtjes ndaj gazetarëve dhe mediave, nga zyrtarë të partisë së tij.
AGK-ja e fton zotin Kurtin ose këdo që e formon Qeverinë e re të angazhohet në një dialog të hapur me të gjithë hisedarët, në mënyrë që të trajtohen me seriozitet gjetjet e Raportit dhe të punohet për përmirësimin e lirisë së mediave në Kosovë.
