106 të kthyerit nga Siria largohen nga Vranidolli, shteti nuk ndau mjete shtesë për ta

32 gra të kthyera nga Siria në Kosovë kanë dalë para organeve të drejtësisë.

Lajme

24/04/2019 10:23

10 prej tyre dyshohet se kanë qenë pjesëmarrëse në grupe terroriste, teksa Prokuroria ka kërkuar për të gjitha ato masën e arrestit shtëpiak, shkruan lajmi.net.

Paraprakisht ato bashkë me fëmijët e tyre po qëndronin në Qendrën për të Huajt në Vranidoll të Prishtinës.

E aktualisht në këtë Qendër nuk është asnjë i kthyer nga Siria.

Këtë për lajmi.net e ka konfirmuar edhe ministri i Brendshëm, Ekrem Mustafa.

“Aktualisht në Vranidoll nuk është asnjë person i kthyer nga Siria”, ka thënë shkurt Mustafa për lajmi.net.

E për 106 të kthyerit nga Siria që deri më tani po qëndronin në Vranidoll nuk ka mjete financiare shtesë për mbulimin e shpenzimeve të tyre.

Këtë e ka konfirmuar për lajmi.net edhe zyra e kryeministri të Kosovës.

Donjeta Gashi, zëdhënëse e Qeverisë ka thënë për lajmi.net se përveç që të kthyerit janë liruar nga ajo Qendër, kjo e fundit i ka kushtet e mira dhe se nuk ka pasur nevojë për mjete shtesë.

Madje ajo thotë se Qendra në fjalë është duke u renovuar.

“Qendra i ka kushtet e mira. Edhe të kthyerit janë liruar dhe një pjesë e Qendrës po ashtu është duke u renovuar. Pra, nuk ka pasur kërkesa ose nevoja për mjete shtesë”, ka thënë Gashi për lajmi.net.

E për katër burrat që dyshohet se ishin pjesë e grupeve terroriste në Siri, Gjykata ka caktuar nga një muaj paraburgim.

Njëri prej tyre madje i përkiste moshës së mitur.

Kujtojmë, se nga 110 të kthyerit nga Siria, 32 janë gra, 4 burra dhe pjesa tjetër janë fëmijë. /Lajmi.net/