Fondacioni për Shoqëri të Hapur në bashkëpunim me Demokracinë në veprim sot kanë hapur fushatën “Vëzhgo dhe voto”.

Me këtë nismë, organizatat e shoqërisë civile synojnë t`i nxisin qytetarët që në ditën e zgjedhjeve të lajmërojnë çdo parregullsi.

Luan Shllaku nga Fondacioni për Shoqëri të Hapur në një konferencë për media ka thënë se qëllimi i kësaj fushate është vetëdijesimi i qytetarëve që të raportojnë për parregullsitë e mundshme në ditën e zgjedhjeve.

“Krahas mesazhit “Dil e Voto” sepse është e rëndësishme të kemi sa më tepër votues, ne do të shkojmë edhe me mesazhin vëzhgo çdo parregullsi të cilën e shihni në vend votime”.

“Ditën e zgjedhjeve secili abonent, e që janë gati 1 milion e gjysmë, do të marrin një mesazh ku do të thuhet se dilni dhe votoni sepse vetëm kështu do të ndërtohet demokracia kosovare, dhe pasi që dalin le t`na dërgojnë një sms falas në rast se shihni çfarëdo parregullsie”.

“Ne do t`i kemi votuesit në funksionin e vëzhguesve dhe si vëzhgues ata janë të ftuar që të dërgojnë sms falas në një qendër që ne e kemi përgatitur që në mënyrën më të mirë në kohë reale t`i tregojmë rezultatet e raporteve të tilla”.

“Të gjithë votuesit i ftojmë që në numrin 50088 të dërgojnë sms falas për të gjitha parregullsitë eventuale që i shohin atë ditë”.

Gjithashtu në ditën e votimit do të krijohen qendra të përpunimit të dhënave për të informuar në rast abuzimesh por gjithashtu rrjedhën e procesit zgjedhor.

Të gjithë sms që do të dërgohen, sipas Shllakut, do të jenë falas një gjë të tillë e kanë mundësuar tri kompanitë e telefonisë mobile në vend.

Ndërsa Ismet Kryeziu nga Demokracia në Veprim ka deklaruar se kjo fushatë ka për qëllim që qytetari i cili do të votojë, të sigurohet që vota e tij është valide.

“Përmes kësaj kampanje, përmes këtyre aktiviteteve, dëshirojmë ta nxisim këtë qytetar i cili do të votojë dhe do të vëzhgojë dhe do të sigurohet që vota e tij është valide, është numëruar saktë dhe është votuar lirë”.

“Ky mesazh, kjo iniciativë, kjo mënyrë tenton ta ngrisë nivelin e qytetarit me nivelin aktiv jo vetëm të vëzhguesit jo vetëm të votuesit por në ruajtjen dhe përgjegjësinë e tij ndaj procesit zgjedhor”, tha Kryeziu.