Sipas Zhbogar miratimi i standardeve evropiane është vendimtar. Kjo sipas tij është arsyeja pse BE-ja po ofron ndihmë nëpërmjet projekteve të binjakëzimit, praktikave më të mira dhe ekspertëve.

Kurse, sa i përket MSA-së, ai ka thënë se pasi të nënshkruhet, MSA do të jetë marrëdhënia e parë kontraktuale mes Kosovës dhe BE-së.

“Kur bëhet fjalë për rrugën evropiane të Kosovës, Evropa është e bashkuar plotësisht në këtë temë, pavarësisht dallimeve të kuptueshme për statusin e Kosovës. Por ka shumë për t’u bërë, natyrisht. Një nga gjërat më të rëndësishme për Kosovën është që të mësojnë të jetojnë së bashku dhe të pranojnë dallimet, qoftë kombëtare, gjuhësore, fetare apo ndonjë tjetër. Për Kosovën kjo do të thotë që të respektojnë komunitetet. Kjo është vlera kryesore e BE-së, pjesë e së cilës Kosova aspiron të jetë”.

Zhbogar ka përmendur edhe një anketë të qytetarëve, ku 79% e qytetarëve të Kosovës thanë se do të votojnë “po” në referendumin për t’u bashkuar me BE-në. Por, ai ka shtuar se datë të saktë për në BE nuk ka, por që Kosova duhet të përmbushë të gjitha kriteret.

“Vizioni dhe vullneti i qytetarëve janë këtu. Por në të njëjtën kohë, pritjet e tyre u bënë më realiste: ata e dinë shumë mirë se ky është një proces i bazuar në merita, dhe se ka ende shumë punë për t’u bërë. Ne nuk mund të japim data të sakta, por ne mundemi, së bashku me palën kosovare, të punojmë në udhërrëfyes të saktë dhe piketa që do ta çojnë integrimin në drejtimin e duhur, duke hequr një pas një barrikadat në këtë rrugë për në BE. Kjo është rruga që ka rëndësi më shumë se vetë qëllimi. Për shkak se nga udhëtimi në këtë rrugë Kosova do të ndryshojë për të mirën e popullit të saj”, ka thënë ai në një intervistë, raporton KosovaPress.