Lëvizja “Vetëvendosje” nga zgjedhjet lokale të 22 tetorit ka dalë me mbi 70 mijë vota më pak, duke i krahasuar me zgjedhjet parlamentare të qershorit të këtij viti, por kreu i këtij subjekti politik, Visar Ymeri, insiston se votat i kanë dyfishuar.

E dyfishimi, sipas tij, është nga zgjedhjet lokale të vitit 2013, duke i krahasuar me këto të fundit, përderisa krahasimi i zgjedhjeve parlamentare me ato lokale është sikur t’i krahasosh “dardhat me mollë”.

Megjithatë Ymeri gjatë një interviste për gazetën “Zëri” është shprehur i bindur se më 19 nëntor do t’i fitojnë të gjashtë komunat ku janë në balotazh, por nëse nuk ndodh një gjë e tillë, atëherë thotë se duhet të analizohen rezultatet dhe të merren përgjegjësitë

Shefi i Vetëvendosjes, ka kritikuar Qeverinë e kryeministrit Ramush Haradinaj, e cila, siç thotë ai, përpos që është e varur nga Serbia, pa kurrfarë nevoje po rritet vazhdimisht për nga numri i ministrave, zëvendësministrave e këshilltarëve.

Prandaj po shikohen mundësitë e përkrahjes së mocionit të votëbesimit të iniciuar nga LDK-ja, në mënyrë që të rrëzohet kjo Qeveri dhe vitin tjetër të mbahen zgjedhjet e parakohshme parlamentare.