Ymeri: Përndjekja ndaj Albinit dhe Donikës nuk ka përfunduar
Kryetari i Vetëvendosjes ,Visar Ymeri, ka reaguar pas lirimit nga paraburgimi të Donika Kadajt dhe Albin Kurtit.
Lajme
Ai përmes një postimi në Facebook ka shkruar se edhe pse është mirë që ata janë liruar, sipas tij përndjekja ndaj tyre ende nuk ka përfunduar.
Sipas Ymerit, Kalludra po i gjykon deputetët e VV-se sepse këta të fundit ja mbrojtën sovranitetin e Kosovës si dhe kushtetushmërinë të cilën synon ta përmbys Vuciqi përmes Thacit e Mustafës.
Ymeri shkruan se gjykimi është politik dhe nuk mund të jetë i drejtë, duke përmendur kështu edhe dënimin e aktivistëve të tjerë të VV-së.
Ky është reagimi i plotë i Ymerit në Facebook:
“Albinit dhe Donikës, Kalludra ua ndërpreu paraburgimin e padrejtë e tërësisht të panevojshëm.
Është shumë mirë që nuk do të mbahen më në burg. Por përndjekja ndaj tyre nuk ka përfunduar. Procesi ndaj Albinit, Donikës, Albulenës e Fatonit po vazhdon. Më 3 janar të vitit të ardhshëm do të shqiptohet vendimi i trupit gjykues ndaj tyre, i prirë nga Beqir Kalludra.
Ky gjykatës po i gjykon deputetët e Kuvendit të Republikës sepse këta ia mbrojtën sovranitetin e territorin kësaj Republike! Ia mbrojtën asaj kushtetuetshmërinë të cilën synonte ta përmbys Vuçiqi përmes Thaçit e Mustafës. Praktikisht Kalludra po thotë se kushtetueshmëria e Republikës nuk është e rëndësishme – ankesat e disa prej eksponentëve të pushtetit që e ka kap shtetin janë ligji në Kosovë!
Gjykimi është politik. Kështu ai nuk mund të jetë i drejtë. Kur nuk është i drejtë është i padrejtë. E gjykata që shqipton padrejtësi nuk mund të jetë gjykatë.
Të mos harrojmë se e njëjta i dënoi Frashërin, Atdheun, Egzonin dhe Adean pa asnjë provë përmes një vendimi skandaloz gjyqësor. Pra kjo gjykatë e ky gjykatës e kanë dëshmuar tashmë se shqiptimin e padrejtësisë e kanë punë të zakonshme.
Deputetët duhen liruar menjëherë nga ky proces i padrejtë.
Aktivistët e dënuar duhen liruar menjëherë nga përndjekja që po u bëhet.
“Padrejtësia kudo është kërcënim për drejtësinë çdokund.” “