Vjosa Osmani pritet t’i bashkohet partisë së Mimoza Kusari-Lilës e Ilir Dedës

Dy iniciuesit e partisë së re në skenën politike të Kosovës, Ilir Deda dhe Mimoza Kusari-Lila, duket të jenë aktivë në terren.

Lajme

26/05/2016 14:32

Telegrafi mëson se shumë shpejt iniciativës së Dedës dhe Kusarit, pritet t’i bashkohet edhe njëra prej figurave më të fuqishme të Lidhjes Demokratike të Kosovës (LDK), Vjosa Osmani.

Sipas këtij burimi, Osmani nuk do të shkojë e vetme në Partinë e Re, por se më të do të shkojnë edhe eksponentë tjerë të LDK-së, të cilët janë përkrahës të kësaj deputete.

“Edhe disa degë të LDK-së, kanë shpreh gatishmërinë  që të kalojnë në Partinë e Re. Por krejt këto pas ardhjes së Osmanit”, ka thënë ky burim.

Partisë, gjatë javëve në vijim, pritet t’i bashkohet edhe avokati Dastid Pallaska, emri i të cilit është lakuar shumë gjatë kohëve të fundit, se do të bëhet pjesë e kësaj iniciative.

Ky burim i Telegrafit, ka theksuar se Deda nuk synon të jetë lider i Partisë së Re, duka iu lëshuar garën figurave tjera të partisë.

“Njëra prej opsioneve të zgjedhjes së liderit, do të mund të bëhet në bazë të një sondazhi me qytetarët. Figura e cila gëzon më së shumti përkrahje nga ana e qytetarëve do të jetë lider i partisë. Nëse kjo jo, atëherë mund të ndodhë që lideri të zgjidhet me short”, ka theksuar ky burim.

Ndryshe, para disa javësh ish – deputeti i Lëvizjes Vetëvendosje (VV), Ilir Deda, ka dhënë dorëheqje nga kjo parti, dhe pati paralajmëruar krijimin e një forcë të re politike, të cilës iu bashkua pas disa ditësh iu bashkua edhe Kryetarja e Gjakovës, Mimoza Kusari – Lila.