Nevojat energjetike të nënave me fëmijë në gji janë më të larta se ato të gruas shtatzënë. Megjithatë, këtyre nënave mund tu rekomandohet një stil ushqyerjeje jo shumë i ndryshëm nga gratë shtatzëna, por duke patur parasysh që nevojat energjike janë dukshëm më të larta se për këto të fundit.

Për këtë grup në veçanti kemi një rritje të kërkesës për proteina (mbi 17gr/ditë) të kalciumit (mbi 200-400 gr/ditë), të jodit (mbi 50 μg/ditë), të zinkut (mbi 5 mg/ditë), të bakrit, seleniumit, të vitaminës A (mbi 350mcg/dite të retinolit ekuivalent), të vitaminave të grupit B, vitaminës C, dhe ujit. Mënyra më e mirë për të siguruar këto nevoja për lëndë ushqyese, konsiston pikërisht në një ushqyerje të pasur dhe të shumëllojshme dhe me sasi të bollshme të konsumit të lëngjeve, transmeton Mapo.al.

Ushqyerja me gji dhe nevojat energjetike

Nevojat energjetike shtesë të nënave me fëmijë në gji varen nga sasia e qumështit të prodhuar. Duke mbajtur parasysh të gjithë faktorët ndikues, nevoja energjetike shtesë gjatë ushqyerjes me gji vlerësohet midis 450-560 kcal /ditë deri në muajin e gjashtë të jetës së fëmijës.

Nevojat e lidhura me prodhimin e qumështit

Prodhimi i qumështit kërkon mbi të gjitha një rritje të nevojave për kalcium, proteina dhe ujë: një rritje e tillë duhet të përballohet pikërisht me anë të ushqyerjes, në të kundërt nevojat e fëmijës do të plotësohen nëpërmjet organizmit amtar.

Uji-humbjet e ujit nga ushqyerja me gji për rreth 750-800 ml qumësht/ditë përllogariten afërsisht në 650-700 ml më tepër që duhen shtuar mbi nevojat normale të organizmit të grave.

Kalciumi- përmbajtja në kalcium e qumështit të nënës është rreth 320 mg/l që do të thotë se për një konsum mesatar ditor të 750 ml qumësht nga ana e latantit nëna humbet çdo ditë 240 mg kalcium. Me qëllim parandalimin e varfërimit të rezervave minerale të organizmit të nënës këshillohet një rritje ditore e marrjeve të kalciumit deri në 400 mg.

Kujdes

Gjatë ushqyerjes me gji ka disa ushqime për tu evituar apo përdorur me kufizime. Disa ushqime (si hudhra, qepa, lakra, bajamet) dhe disa erëza i japin qumështit shije dhe erë që mund të jenë të papëlqyeshme për fëmijën deri në atë gradë sa ta largojnë nga gjiri i nënës: në këtë rast të gjitha këto ushqime duhet të përjashtohen nga ushqyerja e nënës.

Gjithashtu duhet të mënjanohen të gjithë ato ushqime, të cilat pavarësisht vlerave ushqyese që mbartin, janë potencialisht përgjegjës për shfaqjen e shenjave klinike të ngjashme me intolerancën ushqimore: djathërat e fermentuar, frutat e detit, midhjet, kakao, çokollatat, luleshtrydhet, qershitë, pjeshkë, kajsi, etj. Përdorimi i pijeve alkoolike dhe produkteve me përmbajtje substancash që përmbajnë kafeinë gjatë ushqyerjes me gji. Po kështu të evitohen plotësisht superalkooliket (alkooli etilik kalon në qumësht dhe mund të provokojë te fëmija përgjumje, hipoglicemi, të vjella, diarre). Po kështu të shmanget vera, edhe me përmbajtje të ulët alkoolike nuk duhet pirë. Në raste shumë të rralla mund të kufizohet një gotë në ditë por gjithmonë e shoqëruar me ushqim. Po kështu të shmanget konsumimi i kafesë, çajit, kakaos, si dhe pijeve me bazë kola në përgjithësi duhet të kufizohen. Mund të përdorni produkte të dekafeinuara.

Këshilla

Ndaj dhe këshillohet që  gjatë ushqyerjes me gji nevojat ushqyese janë më të larta se ato të shtatzënisë, prandaj një ushqyerje e shumëllojshme, e pasur me ujë, perime të freskëta, peshk, qumësht, dhe nënprodukte të tij, ndihmojnë të ndiheni mirë dhe të prodhoni qumësht plotësisht në përputhje me nevojat e fëmijës suaj. Mënjanoni të gjitha ushqimet që mund të shkaktojnë erë, ose shije të papëlqyeshme në qumësht, apo që i shkaktojnë fëmijës shfaqje alergjie. Mënjanoni pijet alkoolike. /Lajmi.net/