Universiteti “Haxhi Zeka” mbështet Programin Nacional për Rininë

Koordinatori nacional për kulturë rini dhe sport, Rexhep Hoti, nënshkroi marrëveshje bashkëpunimi me rektorin e universitetit "Haxhi Zeka".

Lajme

12/02/2019 10:56

Me qëllim të realizimit të Programit Nacional për Rininë edhe për studentët e Universitetit “Haxhi Zeka” në Pejë, koordinatori nacional për kulturë rini dhe sport në Qeverinë e Republikës së Kosovës, Rexhep Hoti, nënshkroi marrëveshje bashkëpunimi me rektorin e këtij universitetit Fadil Millaku.

Koordinatori Hoti tha se ky program mundëson pjesëmarrjen e të gjithë studentëve të Republikës së Kosovës pa dallim. Ai kërkoi mbështetje nga rektori për studentë vullnetarë për të vëzhguar procesin e garës.

“Programi Nacional për Rininë parasheh përfshirjen e rreth 110.000 studentëve nga të gjitha universitet dhe kolegjet e Kosovës në garën e sportit dhe kreativitetit kulturor dhe mendimit kritik. Studentët do të kenë mundësinë të tregojnë aftësitë e veta sportive dhe kreative përmes këtyre garave dhe më të mirët e këtyre fushave do të shpërblehen. Kërkoj mbështetjen e juaj për studentët vullnetarë për të vëzhguar procesin e garës pasi që, mendja më e pakorruptuar dhe më e pastër e shoqërisë është studenti”, tha Hoti, përcjell lajmi.net.

Ndërkaq, rektori Fadil Millaku e garantoi mbështetjen e programit duke thënë se pret që të jetë një projekt i suksesshëm.

“Për fat të keq në vitet para lufte ka pasur shumë më shumë gara se sa që mbahen tash. Jam shumë i lumtur që një program ekskluziv për garën do të zhvillohet këtë vit. Studentët dhe nxënësit kanë nevojë për aktivitete të tilla sepse i largon ata nga dukuritë negative dhe ndihmon shumë në socializmin mes nxënësve dhe studentëve”, tha rektori Millaku.

Marrëveshja e bashkëpunimit përcakton angazhimet e ndërsjella të palëve nënshkruese për implementimin e Programit Nacional për Rininë dhe për organizimet e përbashkëta të aktiviteteve që kanë të bëjnë me përfshirjen e studentëve në garat e kreativitetit kulturor dhe mendimit kritik si dhe të sportit. /Lajmi.net/