Ultrasi i Napolit vendosi për zhvillimin e finales
E pabesueshme, por e vërtetë. Një prej udhëheqësve të tifozëve të Napolit, vendosi për zhvillimin e ndeshjes finale të Kupës së Italisë kundër Fiorentinës, në stadiumin Olimpico të Romës.
Sport
Quhet Gennaro, dhe është udhëheqës i tribunës A në San Paolo të Napolit, tifozi që bisedoi me kapitenin Marek Hamsik dhe zyrtarë të ndeshjes finale të Kupës së Italisë kundër Fiorentinës, në stadiumin Olimpik të Romës.
I shoqëruar nga dy udhëheqës të tjerë të grupit të tifozëve të Napolit që mbushën sektorin e caktuar për ta në Olimpico, Gennaro fillimisht dukej kundër zhvillimit të ndeshjes për shkak të përleshjeve të përgjakshme që ndodhën jashtë stadiumit – por me tifozët e nikoqirit të finales, Romës – para se të bënte me shenjë për qetësi në tribunën e Napolit, pas hedhjes së disa fishekzjarrëve në drejtim të kujdestarëve.
Pastaj, ai bisedoi me kapitenin e Napolit, Hamsik dhe i tha atij që të dalin dhe të luajnë.
Në fund, u dha njoftimi se ndeshja do të zhvillohet, edhe pse me 45 minuta vonesë.
Në Itali funksionon kështu.