Në forumin për teknologjinë e informacionit dhe inovacionin, që po mban sot Ministria e Zhvillimit Ekonomik, mes tjerash u tha se është koha që në Kosovë të ngritët Universiteti i Teknologjisë së Informacionit. Për këtë, u tha, Kuvendi i Republikës së Kosovës do të japë përkrahjen e vet si krijues i tij.

Kryeministri Isa Mustafa, i cili mori pjesë në forum, tha se në Kosovë ka numër të madh të të rinjve që kanë ambicie në fushën e teknologjisë informative dhe në inovacion.

“Ne kemi ndërtuar një sistem bankar i cili është i ri, i cili është i pajisur me mjaft shërbime në teknologjinë informatike dhe i cili sistem mund të ndërlidhet edhe me sistemin ekonomik, ndërmarrjet e vogla dhe të mesme”.

“Ne nuk kemi shumë ndërmarrje të mëdha, ndërmarrjet e mëdha i kemi kryesisht në sektorin publik, ndërmarrjet e mesme dhe të vogla i kemi në sektorin privat. Ne mund të ngremë vetëdije të disa firmave të jenë në hap për zhvillimin e kësaj dhe po ashtu kemi në programin qeverisës që të informatizojmë të gjitha shkollat në mënyrë që nxënësit ta aplikojnë teknologjinë informative në të gjitha fazat e arsimimit të tyre nga arsimi fillor, i mesëm dhe arsimi i lartë dhe mendoj që përveç kësaj ne mendojmë se mund ta krijojmë një kulturë të kësaj teknologjie”, tha ai.

Ministri i Zhvillimit Ekonomik Blerand Stavileci mendon se shoqëria kosovare duhet të nisë të mendojë më shumë për ekonominë kreative dhe për ekonominë digjitale

“Ne e kemi diskutuar edhe me kryeministrin, kryeparlamentarin, ministrat përkatës, të financave, tregtisë e industrisë, edukimit, që dalëngadalë të fillojmë, që edhe sistemin e edukimit të fillojmë t’ia përshtasim kërkesave të tregut të punës. Dhe në këtë rast, në tregun e punës për ata sektorë ku më së lehti dhe më së shpejti mund të gjenerohen vende të reja të punës. Dhe gjenerimi i vendeve të reja të punës mund të bëhet më së shpejti dhe më së miri, unë kujtoj, me gjenerimin dhe eksploatimin e dijes nëpërmjet kreativitetit njerëzor dhe inovacionit. Dhe kjo gjë nuk mugon në shtetin tonë, gjithmonë e themi që kemi një rini të shkëlqyer”, tha ai.

Forumi për Teknologjinë e Informacionit dhe Inovacion, është një nismë e ndërmarrë nga Ministria e Zhvillimit Ekonomik të Kosovës, që ka për qëllim mbledhjen e aktorëve kryesorë vendimmarrës të fushës së TI-së, për të diskutuar çështje të cilat ndërlidhën me zhvillimin dhe avancimin e këtij sektori në Kosovë.

Ministria e Zhvillimit Ekonomik vlerëson teknologjinë informative si faktor themelorë për një ekonomi të orientuar nga dijet. Sipas MZHE-së, përfaqësimi gjithëpërfshirës në panele, kryesuar nga ekspertë ekonomikë, akademikë, institucione qeveritare dhe donatorë potencialë, do të kontribuojë në krijimin e mundësive për një dimension dhe realitet të ri të strategjisë ekonomike.