Në pikën kufitare të Hanit të Hotit, policia shqiptare ka ndaluar disa dhjetëra tifozë kroatë. Lajmi konfirmohet nga zyrtarët e klubit korçar, që mbeten në kontakte të shpeshta me drejtuesit e policisë së shtetit, për të garantuar mbarëvajtjen e takimit dhe të evitohen të gjitha incidentet.

Sipas të njëjtave burime nga Skënderbeu, tifozët dyshohet se i përkasin grupimit të huliganëve, “Bad Blue Boys”. Ata tentuan të hynin nga pika kufitare me Malin e Zi. Të gjithë ishin të gjithë të pajisur me bileta për ndeshjen, por nuk kishin autorizim nga klubi i Dinamos për të qenë të pranishëm në stadium.

E njëjta gjë ka ndodhur edhe në kufirin e Kroacisë me Bosnje Hercegovinën. Sipas mediave në Zagreb, 80 tifozë të Bad Blue Boys që po udhëtonin drejt Shqipërisë u ndaluan.

Pjesa më e madhe e tyre ishin të skeduar për dhunë në stadiume, raporton SuperSport. Pas kontrolleve në mjetet me të cilat udhëtonin, tifozëve iu gjetën mjete piroteknike. Disa prej tyre u ndaluan nga policia, ndërsa të tjerë u kthyen mbrapsht.

Edhe në këtë rast mungonin autorizimet e skuadrës së Dinamos. Një zgjedhje e klubit nga Zagrebi, që biletat në dispozicion vendosi t’i shpërndante vetë, për të evituar që ato të binin në duart e tifozëve problematikë.

Megjithëkëtë këto masa dhe kontrollet në kufi, dyshohet se një numër i konsiderueshëm ultrasish kroatë ndodhen në Shqipëri. Policia ka njoftuar se personat pa autorizim nuk do të hyjnë në stadium.

Mbi 400 uniformat blu dhe personeli i sigurisë prej 250 personash, do të kenë edhe mbështetjen e 4 oficerëve të sigurisë nga Kroacia, të cilët do të evidentojnë huliganët, për të mos i lejuar të hyjnë në stadium.