Thaçi takoi Kryeministren e Bangladeshit, e falënderoi për mbështetjen e dhënë

Presidenti i Republikës së Kosovës, Hashim Thaçi, ka takuar sot, në Nju Jork, Kryeministren e Bangladeshit, Sheikh Hasina.​

Lajme

21/09/2017 21:28

I shoqëruar nga Zëvendëskryeministri i parë dhe Ministri i Punëve të Jashtme, Behgjet Pacolli, presidenti Thaçi shprehu kënaqësinë për takimin e parë dypalësh mes dy vendeve përkatëse, qëkur Bangladeshi e ka njohur Kosovën si shtet të pavarur dhe sovran, thuhet në njoftimin presidencial.

Kreu i shtetit tha se Kosova është e përkushtuar për të rritur bashkëpunimin me Bangladeshin dhe se dy vendet do të vendosin së shpejti marrëdhënie diplomatike dhe do të shkëmbejnë ambasadorët, transmeton lajmi.net.

Presidenti Thaçi iu falënderua kryeministres Sheikh Hasina edhe për mbështetjen e Bangladeshit për anëtarësimin e Kosovës në organizata ndërkombëtare.

“Mbështetja e Bangladeshit në Organizatën e Bashkëpunimit Islamik (OBI) për njohjen e mëtejshme të Kosovës është e rëndësishme dhe ne ju jemi mirënjohës për mbështetjen që ju keni dhënë rezolutës që përkrah pavarësinë e Kosovës”, ka thënë presidenti Thaçi gjatë takimit me Kryeministren e Bangladeshit, Sheikh Hasina. /Lajmi.net/