Thaçi mirëpret marrjen e presidencës së BE-së nga Austria, thotë se i shërben Kosovës

Presidenti i vendit, Hashim Thaçi, është shprehur optimist se pas marrjes së presidencës së BE-së, Austria do të shtyjë përpara agjendën evropiane  të Kosovës.

Lajme

01/07/2018 12:52

Përmes një postimi në Facebook, Thaçi shkruan se Kosova duhet të vazhdojë në zbatimin e reformave të rëndësishme politike dhe ekonomike drejt anëtarësimit në BE.

Ky është postimi i plotë i Thaçit në Facebook:

Presidenca e BE-së nga Bullgaria dhe Samiti i Sofjes ishin një sukses i plotë dhe një hap i madh përpara drejt jetësimit të aspiratës sonë për anëtarësim në BE. E falënderoj kryeministrin bullgar, Boyko Borissov, për rolin dinamik në mbështetje të shteteve të Ballkanit Perëndimor, në gjashtë muajt e fundit të kryesimit të presidencës.

Presidencën e BE-së tani e merr një shtet tjetër mik i Kosovës, Austria. Unë kam besim të plotë në vizionin dhe energjinë e kancelarit austriak, Sebastian Kurz, për të shtyrë përpara agjendën evropiane të shtetit tonë dhe shteteve të Ballkanit Perëndimor.

Ne duhet të vazhdojmë me zbatimin e reformave të rëndësishme politike dhe ekonomike, të nevojshme në rrugën e pakthyeshme drejt anëtarësimit në BE”./Lajmi.net/