Në njoftim thuhet se rrugët kryesore të qytetit që janë nën menaxhimin e Komunës së Prishtinës janë të kalueshme dhe po mirëmbahen që nga mëngjesi.

 

“Ekipet e Drejtorisë së Shërbimeve Publike, Mbrojtjes dhe Shpëtimit si dhe Drejtorisë së Inspekcionit janë në terren, të gatshme për të intervenuar në çdo kërkesë të qytetarëve. Aktualisht, janë duke u pastruar edhe rrugët dytësore të kryeqytetit”, thuhet në njoftimin e Komunës së Prishtinës.

 

Rrugët e qytetit, siç thuhet në njoftim janë të ndara në katër grupe dhe për mirëmbajtjen e tyre janë përzgjedhur katër kompani: “Zahiri”, “Toifor”, “Euro Partners dhe Alko Impex”.

 

Që të katërta, do të kujdesen për mirëmbajtjen e gjithsej 310 rrugëve të qytetit, ndërsa, për mirëmbajtjen e rrugëve në viset rurale të Komunës së Prishtinës, siç njofton komuna janë të kontraktuara dy kompani, “VZ kompani” dhe “Dardania”.

 

”Të gjitha këto kompani sipas kontratës, e kanë për detyrë të bëjnë heqjen e borës, pastrimin e rrugëve dhe trotuareve, hedhjen e kripës sipas nevojës, pastrimin e ngricave si dhe të gjitha problemet e tjera që i sjellë stina e dimrit”, thuhet në njoftimin e komunës.

 

Komuna e Prishtinës, po ashtu bënë lutje tek të gjithë shoferët që të jenë të kujdesshëm gjatë vozitjes si dhe mos të dalin në komunikacion pa pajisjet dimërore.