Ngatërresë artistësh: “Brisku” i Shatrollit i preu “Dashnorët” e Gorancit
Teatri Profesionist i Pejës, të shtunën do ta ketë një shfaqje premierë. Por para se aktorët të ngjiten në skenë, një dramë akuzash është inskenuar tashmë.
Lajme
Teatri kishte vendosur më 15 janar të vitit 2015, të inskenojë komedinë “Dashnorët” e autorit Osman Goranci me regjisor Ben Apolloni. Në mungesë të fondeve, drejtori i Teatrit e kishte shtyrë procesin e kësaj komedie.
Këtë vit Teatri “Istref Begolli”, morri 7 mijë euro nga Ministria e Kulturës për këtë tekst. Autori Goranci vendosi që regjisor të jetë Naser Shatrolli.
E këtu edhe plasë i gjithë sherri, ndërmjet regjisorit Shatrolli dhe autorit Goranci. Në një intervistë dhënë për KultPlus, Goranci tregoi detaje të tjera për mos inskenimin e shfaqjes së tij, për mospagesën e dëmit e mbi të gjitha në ndërrimin e tekstit të tij.
“Pasi që, teksti veç miratohet nga Këshilli Drejtues i Teatrit të Pejës, me 15 dhjetor, Naser Shatrolli ma dërgon një mesazh duke më uruar dhe falënderuar për kalimin e tekstit në leximin e parë. Më 30 dhjetor, përsëri më dërgon një mesazh duke më thënë se duhet të bëjë disa ndryshme të vogla, ku në këtë rast i them se është në rregull”, tregon Goranci.
Më 20 janar të këtij viti, në profilin e tij në facebook, Shatrolli publikon se ka filluar provat e shfaqjes së tij “Brisku”, shfaqje kjo që do të inskenohet në Teatrin Profesionist të Pejës.
“Unë çuditem dhe e thërras drejtorin e Teatrit të Pejës, i cili më thotë që ta lë, sepse s’është asgjë që është ndërruar titulli, dhe nuk e bëra të madhe. Me 25 janar, Naseri ma dërgon një mesazh duke më thënë se komedia nuk po i shkon, duke më thënë se ka bërë një tekst tjetër me motive të tekstit tim, dhe unë i thash se nuk guxon të ndërroj asgjë pa më pyetur mua”, vazhdoi Goranci.
Ai ka reaguar në institucionet e Pejës, por pasi nuk gjeti zgjidhje u ankua edhe në Ministrinë e Kulturës.
Por jo njëjtë tregon regjisori Naser Shatrolli. Ai në një prononcim për KultPlus, tregon se tekstin të cilin ai e ka bërë nuk ka asnjë motiv të tekstit të Osman Gorancit, por megjithatë Shatrolli nuk e mohon faktin se Gorancin ka dashur ta bëjë bashkautor.
“‘Brisku’, është tekst i ri i shkruar gjatë procesit, dhe nuk kam as një presje të tekstit të Osmanit. Unë nuk kam as motive, as asgjë nga teksti i Osmanit, dhe të tregoj të drejtën i kam thënë, po ta qes emrin si bashkëautor, por ai nuk ka dashur, pasi që, ka dashtë ta inskenojë tekstin e tij pra ‘Dashnorët’. Ne e kemi premierën të shtunën, dhe shpresoj që çdo gjë të shkoj siç duhet”, u shpreh Shatrolli.
Për këtë çështje, për KultPlus foli edhe drejtori i Departamentit të Kulturës në Komunën e Pejës, Engelbert Zefaj. Sipas Zefajt, ky ka qenë një keqkuptim midis regjisorit dhe tekstshkruesit, dhe i gjithë ky keqkuptim ka ndodhë për faktin se i kanë besuar verbërisht njëri-tjetrit, duke bërë kështu që mos të kenë asnjëherë asnjë marrëveshje me shkrim.