Ky është informacioni që ka ardhur përmes një komunikate për media, ku thuhet se për këtë rrjet u vendos në një takim të studentëve dhe të rinjve të sapodiplomuar në fakultete të ndryshme dhe disa të rinjve shqiptarë që në Suedi kanë kryer edhe studimet pasuniversitare.

Takimi u mbajt në organizim të përbashkët të Ministrisë së Diasporës të Kosovës dhe të Unionit të Shoqatave Shqiptare në Suedi.

“Deri tash janë themeluar 5 lidhje të këtilla në shtetet e Evropës dhe deri në fund të këtij viti planifikojmë që të themelojmë edhe tri lidhje të tilla. Përmes këtyre organizimeve, zëri i të rinjve të diasporës do të dëgjohet më mirë dhe do të jetë më i fortë”, tha zyrtari i kësaj ministrie Lorik Pustina.

Elis Badalli, i cili udhëheq divizionin për kulturë dhe sport në kuadër të Ministrisë së Diasporës, pos tjerash nënvizoi se kjo ministri ka projekte dhe fonde, përmes së cilave konkretisht do të përkrahen veprimtaritë e të rinjve shqiptarë kudo që ata janë në diasporë.

Ndërkaq, Ramadan Mramori ka informuar pjesëmarrësit lidhur me rrjedhat dhe rëndësinë që ka regjistrimi i bashkëkombëseve tanë që jetojnë dhe veprojnë në diasporë.

Rrjeti i studentëve dhe të rinjve shqiptarë në Suedi, në këtë takim zgjodhën edhe kryesinë prej shtatë anëtarësh.

Kryesia ka këtë përbërje: Arjeta Binaku dhe Renata Qato do të jenë koordinatore, kurse anëtarë të kryesisë u zgjodhën edhe Argjend Veliu, Pajtim Sylejmani, Agon Reshitaj, Besa Ademi dhe Gazmir Vukaj.

Përveç zyrës, atyre do t’iu ofrohet edhe ndihmë në hartimin e projekteve nga Ministria e Diasporës. /KosovaPress/