Ndonëse temperaturat sot kanë arritur në pikën më të lartë gjatë këtij viti, shumë qytetarë prishtinas, nuk kanë hezituar të frekuentojnë sheshet e kryeqytetit, ku i nxehti thuajse dyfishohet, shkaku i betonit gjithandej.

Madje, kishte nga ata qytetarë që thonë se as që po e ndiejnë vapën e madhe që po mbizotëron.

“Shumë mirë është, tash po e dimë verën që është verë, se deri tash ka qenë goxha ftoftë koha”, u shpreh një qytetarë.

Për temperaturat e larta, ka folur për lajmi.net edhe profesori i meteorologjisë në Universitetin e Prishtinës, Sylë Tahirsylaj.

Ai theksoi se sot është dita më e nxehtë e kësaj jave, mirëpo sipas tij kjo nuk do të jetë dita e fundit më e nxehtë për këtë muaj.

“Vendi ynë do të vazhdojë të jetë nën ndikimin e masave ajrore  të nxehta të cilat vinë nga pjesa e Afrikës Veriore, këto masa kanë shprehur veprimin e tyre në gjithë rajonin por edhe në vendin tonë, prandaj sot është dita më e nxehtë e kësaj jave por kjo nuk do të jetë dita e fundit si më e nxehta”, tha Tahirsylaj.

Ai tha se temperatura më e lartë sot po shënohet në Prizren, me 34 gradë, por deri në fund të muajit mund të kemi temperatura që shkojnë deri në 38 gradë, edhe pse sipas tij, Kosovën e mbrojnë Malet e Sharrit, duke mos lejuar depërtimin e temperaturave të larta.

“Më e larta gjatë këtij muaji mund të jetë deri në 38 gradë celsius, në Prizren. Kosova ka një specifikë të veçantë, pasi Malet e Sharrit nuk e lejojnë që të depërtojnë masat ajrore të nxehta, depërtimi i saj është i pamundshëm”, tha Tahirsylaj.

Sipas profesor Tahirsylajt, do të ketë thatësira por jo aq të theksuara meqenëse, siç tha ai, ka pasur reshje gjatë këtij viti dhe liqenet janë të mbushur përplot. /lajmi.net