Ata që janë të interesuar për kandidat për kryetar të Komunës së Mitrovicës veriore mund të aplikojnë vetëm edhe sot.

Zyrtarë të KQZ’së thonë se edhe pse orari i punës është deri në orën 18:00, aplikacionet mund t’i presin deri në ora 24.

Zëdhënësi i KQZ, Valmir Elezi tha për Radio Kosovën se deri në këtë kohë ende nuk është paraqitur as një kandidat i vetëm për postin e kryetarit në këto zgjedhje të jashtëzakonshme për Kryetar të Komunës së Mitrovicës veriore.

Zgjedhjet për Kryetar të kësaj komune do të përsëriten më 23 shkurt, pasi kryetari i zgjedhur Krstimi Pantiq kishte refuzuar të bënte betimin me ligjet e Kosovës.

Ndërkohë njëri nga kandidatët më serioz për kryetar komune në Mitrovicën e veriut Oliver Ivanoviq, kryetar i listës SDP ditë më parë i është caktuar masa e paraburgimit prej një muaji pasi dyshohet për krime lufte dhe vrase të rëndë.