Oda Ekonomike e Kosovës (OEK) ka kërkuar që çdo ngritje e mundshme e çmimit të energjisë elektrike do të duhej të amortizohej përmes një mase fiskale nga qeveria e vendit, siç do të ishte ulja e TVSH-së, masë kjo që do të ulte sadopak ngarkesën e madhe në çmim të energjisë elektrike. 

Nën anën tjetër në Ministrinë e Financave thonë se asnjëherë deri më tash nuk kanë pas kërkesa zyrtare për uljen e TVSH-së për energjinë elektrike. Ata kanë sqaruar se TVSH në Kosovë përdorët në mënyre lineare për të gjitha produktet njësojë dhe nuk ka mundësi ligjore që kjo të bëhet në mënyrë të përshkallëzuar. 

“Duhet pasur parasysh se lartësia e TVSH-së është përcaktuar me akte ligjore dhe çdo ndryshim i saj duhet të bëhet përmes procedurës së paraparë për ndryshimet dhe plotësimet e ligjeve. Kjo kërkon respektimin e procedurave për hartimit të Ligjit mbi Ndryshimin dhe Plotësimin e Ligjit për TVSH-në, që nënkuptojnë përgatitjen e një akti të tillë nga ministria kompetente në këtë rast nga Ministria e Financave, aprovimi i draft ligjit në Qeverinë e Republikës se Kosovës dhe aprovimin definitiv në Kuvendin e Republikës së Kosovës”, thuhet në përgjigjet me shkrim të Ministrisë së Financave. (Tribuna)