S’ka sanksione për prokurorët të cilëve u dështojnë aktakuzat

Përfaqësues të Shoqërisë Civile dhe njohës të çështjeve të drejtësisë pohojnë se duhet të rishikohet se ku qëndron problemi i hedhjes së aktakuzave të rasteve të korrupsionit ku janë të përfshirë zyrtarë të lartë.

Lajme

09/06/2018 10:18

Në rastet kur një prokurorit nuk i kalojnë vazhdimisht lëndët në gjykatë për gabime procedurale ose për gabime të qëllimshme, sipas tyre ai prokuror pas vlerësimit duhet të lirohet nga detyra e tij, shkruan sot Gazeta “Zëri”.

Shumë aktakuza të profilit të lartë kanë përfunduar me aktgjykim lirues nga gjykatat në mungesë të provave, duke përfshirë rastin e ish-rektorit të Universitetit të Prishtinës Enver Hasanit, të ish-kreut të Gjykatës së Apelit Sali Mekajt, të ish-sekretarit të përhershëm të Ministrisë së Shëndetësisë Ilir Tolajt e shumë raste të tjera.

Kjo ka nxitur reagimin e shoqërisë civile dhe të njohësve të çështjeve të drejtësisë, të cilët pohojnë se duhet të rishikohet se ku qëndron gabimi te ngritja e aktakuzave të pabaza ose të mungesa e guximit për luftimin e korrupsionit në nivel të lartë. Zyrtarë të Prokurorisë së Shtetit pohojnë se ka pasur raste kur prokurorët janë detyruar të shkojnë në trajnime, pasi për performacën e tyre janë vlerësuar minimalisht nga Komisioni për Vlerësim të Performacës.

Çështja e vlerësimit të performancës së prokurorëve, sipas tyre, është rregulluar me Rregulloren Nr. 12/2015, për Vlerësimin e Performancës së Prokurorëve, e cila përcakton kriteret dhe burimet e informacionit për të realizuar vlerësimin e performancës nga ana e Komisionit për Vlerësimin e Performancës së Prokurorëve.

Kryetarja e Komisionit për Vlerësimin e Performancës së Prokurorëve, Ikramije Bojaxhiu, thotëse çështja e aktakuzave të parashtruara nga prokurorët dhe të vendimeve gjykuese e liruese të gjykatës përbëjnë vetëm dy nga kriteret e përcaktuara në procesin e vlerësimit të performancës së prokurorëve.