Kandidati për kryetar të Prishtinës nga radhët e Lëvizjes Vetëvendosje, Shpend Ahmeti, me gjasë nuk do të debatojë në transmetim të drejtpërdrejtë televiziv me kundërkandidatin e tij nga Lidhja Demokratike e Kosovës, Arban Abrashi, as të premten.

Pas refuzimit për të marrë pjesë në debat zgjedhor përballë Abrashit në Kohavision (në kuadër të emisionit “Rubikon”, të Adriatik Kelmendit), të martën, dhe në Radio Televizionin e Kosovës, të mërkurën, kryetari aktual i Prishtinës duket se nuk do të debatojë me kandidatin e LDK’së as në RTV 21, në kuadër të emisionit “Debat përnime”, të Jeta Xharrës.

Debati te Xharra, mes Ahmetit dhe Abrashit, është planifikuar të zhvillohet të premten, nga ora 19:45.

Por, Ahmeti, nëpërmjet një njoftimi në llogarinë e tij zyrtare në Facebook, ka paralajmëruar se atë ditë, nga ora 19:30, do të jetë i pranishëm në tubimin përmbyllës të partisë së tij në Prishtinë.

Tubimi i Vetëvendosjes, ku Ahmeti ka thënë se do të jetë i pranishëm, nis vetëm 15 minuta para kohës së paraparë për fillimin e debatit mes tij dhe Abrashit.

Ahmeti e Abrashi janë ballafaquar me njëri-tjetrin deri më tani vetëm një herë, në studiot e Klan Kosovës, të hënën.

Fushata për balotazhin e zgjedhjeve lokale, që do të mbahet më 19 nëntor, përfundon zyrtarisht të premten.