Sejdiu: Është momenti më i vështirë në jetën time, largohem nga Vëllaznimi
Vëllaznimi nuk ka arritur të triumfojë në ndeshjen kryesore të sezonit në barazh ndaj Ferizajt.
Sport
Skuadra gjakovare është mposhtur pas penalltive me rezultat 3-2 dhe do të luaj në edicionin e ardhshëm në Ligën e Parë.
Trajneri i deritashëm i Vëllaznimit, Gani Sejdiu ka dhënë dorëheqjen pasi ka thënë se nuk e ka përmbushur misionin.
“Deri këtu e kam pasur. Nuk kam pse të qëndroj, sepse nuk e kam kryer detyrën time për të cilën kam ardhur, pasi nuk mbijetuam në Superligë”.
“Më vjen shumë keq. Kurrë në jetën time moment më të vështirë nuk kam pasur e nuk do të kem. Megjithatë, kush e do Vëllaznimin duhet ta dojë edhe në Ligën e Parë”, është shprehur Sejdiu, transmeton Telegrafi.
Në fund Sejdiu tha se futbollistët dhanë maksimumin për ta fituar ndeshjen por aq ishte kapaciteti i tyre.
“Është shumë e vështirë, sepse futbollistët kanë dhënë maksimumin për të fituar. Tragjike është se ka rënë ekipi, por djemtë e dhanë maksimumin, potenciali i tyre ka qenë kaq. çdo gjë kishte, por vetëm lojë jo, pasi kundërshtari kishte zgjedhur që të shkonte në vazhdime e më pas në penallti”.
“Pastaj, puna e penalltive është çështje psikologjike. Tre-katër lojtarë që kanë shënuar në të kaluarën u frikuan që të gjuajnë penalltitë dhe kjo dëshmon se lojtarët ishin në presion. Pastaj u detyruam të caktojmë lojtarët që të gjuajnë pa dëshirën e tyre”, përfundoi Sejdiu.
Në fund trajneri mitrovicas tha se beson që Vëllaznimi do të riorganizohet shpejtë dhe do të rikthehet në Superligë.