Blerim Xhemajli me gjasë do të largohet nga Napoli në fund të këtij sezoni. Mesfushori shqiptar vazhdon të qëndrojë në bankinë, pasi trajneri Rafael Benitez ka preferenca tjera.

Përfaqësuesi zviceran i ka zhvilluar vetëm 25 ndeshje deri tash në kampionat dhe kupa dhe vetëm 19 prej tyre i ka nisur nga fillimi.

Kjo ka bërë që futbollisti shqiptar nga Maqedonia të kërkojë të shitet, pasi në fund të sezonit të kaluar ishte protagonist absolut i ekipit të Walter Mazzarrit.

Ish futbollisti i Boltonit, Torinos e Parmës ka kontratë me Napolin deri në vitin 2015, por as klubi e as lojtari nuk duan ta respektojnë deri në fund këtë kontratë.

Xhemajli pritet të shitet gjatë verës. Dhe, interesimet për të nuk mungojnë. Vitin e kaluar dëshironte të shkonte në Milan, por mesfushori shqiptar tash pëlqehet edhe në Bundesligë.

Sipas mediave italiane, Schalke dhe Borussia Monchengladbach ia kanë vënë syrin futbollistit kualitativ.

Në rast se e zgjedh këtë të dytën, Xhemajli do të luante së bashku me bashkëkombësin, Granit Xhaka. Edhe aty ku është, tetovari luan me bashkëkombësin, Valon Behrami.