Rritet numri i fëmijëve që vuajnë nga sëmundjet malinje. Sipas të dhënave të institucioneve shëndetësore në vitin 2013 ka qenë 48 të prekura, përderisa në vitin 2012 ishin 44 raste.

Nga këto më së shumti dominonë sëmundja e leukemisë me 25 raste, ndërsa përqindja tjetër i përfshinë sëmundjet e tjera malinje siç janë, tumoret e trurit, tumoret solide, limfomat, e tumor e të tjerë, që i përkasin sëmundjes fëmijërore.

Vetëm në gjashtë mujorin e parë të vitit 2013 në Kosovë, por jo të trajtuara të gjitha në QKUK, ka pasur të regjistruara zyrtarisht 735 raste të sëmundjeve malinje te fëmijët.

Violeta Grajqevci, doktoreshë kryesore në Repartin e Hematologjisë, Leukemisë dhe Onkologjisë, në Klinikën e Pediatrisë në QKUK, ka thënë për Kosovapress, se rreth 70 për qind të rasteve të cilat janë lajmëruar në repartin e tyre janë trajtuar.

Ajo ka thënë se ka raste kur me një periudhë të caktuar kohore, pacientit mos t’i reagoi terapia dhe në këtë rast duhet të kërkojë trajtim jashtë vendit, për të shkuar me një protokoll shumë më agresiv ose që mund të vijë deri te transplantimi i palcës kockore.

Megjithëse, trajtimi i këtyre sëmundjeve bëhet edhe në QKUK me protokolle të avancuara si në gjithë Evropën, Grajqevci, ka thënë se në disa raste pacientët udhëzohen të dalin jashtë vendit për shërim.

“Trajtimi i këtyre rasteve me sëmundje malinje bëhet me protokolle të avancuara, me protokolle që përdoren në gjithë Evropa”.

“Janë protokolle bashkëkohore që ne i zbatojmë, por ka raste që nuk reagon ky protokoll, atëherë duhet të shkojmë me një protokoll shumë më agresiv ose me transplantimin e palcës kockore, që te ne kjo nuk mund të realizohet atë herë këta fëmijë kërkojnë trajtim jashtë Kosovës”.

Terapia për sëmundjet malinje kushton shumë, kurse familjeve në shumicën e rasteve i duhet që mjetet t’i sigurojë vet.

Zëdhënësi i Ministrisë së Shëndetësisë, Faik Hoti ka thënë për Kosovapress, se për ministrinë, prioritet kanë moshat e reja, sidomos trajtimi i fëmijëve, pasi shërimi i sëmundjeve malinje është jashtëzakonisht i kushtueshëm.

Hoti, ka thënë se rreth ¼ e buxhetit të përgjithshëm është i ndarë për farmaceutikën, mbulimin e nevojave të barnave, materialin shpenzues dhe citostatikë.

“Mund të them se rreth ¼ e buxhetit të përgjithshëm të ndarë për farmaceutikën, për mbulimin e nevojave të barnave, materialin shpenzues dhe citostatikë ka qenë e dedikuar vetëm për kategorinë e fundit, pra, për blerjen e citostatikëve me të cilët trajtohen personat e prekur nga sëmundjet malinje”.

“Diku rreth 4 deri 6 milionë euro në kuadër të buxhetit prej 21 milionë euro që ka qenë për sektorin farmaceutik iu ka dedikuar vetëm këtyre sëmundjeve”.

Sipas tij, duke qenë se këto janë sëmundje që kërkojnë trajtim afatgjatë dhe janë të kushtueshme, nuk janë të përmbushura të gjitha kërkesat.

Ai ka thënë se për trajtimin e sëmundjeve jashtë vendit, ministria ofron deri në 30 mijë euro ndihmë, ndërsa, kur kjo shumë tejkalohet, Hoti ka thënë se është kompetencë ekskluzive e Qeverisë që të merret me këtë çështje.

“Natyrisht nuk janë përmbushur gjitha kërkesat, sepse ka pasur raste të cilat janë trajtuar jashtë vendit dhe siç e dini një rast i leukemisë mund të marrë edhe deri 150 mijë apo 250 mijë euro për një trajtim jashtë vendit, ndërsa në bazë të udhëzimit administrativ për trajtim jashtë institucioneve shëndetësore publike shuma maksimale e lejuar prej Ministrisë së Shëndetësisë është deri në 30 mijë euro”.

“Rastet që e tejkalojnë këtë shumë janë kompetencë ekskluzive e Qeverisë së Kosovës. Sidoqoftë, ministria ka ndihmuar disa raste me këto vlera, ndërsa në raste të caktuara përmes marrëveshjeve bashkëpunimit mes Ministrisë së Shëndetësisë, siç e kemi pasur me Republikën e Turqisë”.

“Kemi pasur edhe raste që janë trajtuar falas duke hasur natyrisht mirëkuptimin e shteteve të cilat kanë pranuar që këto raste t’i trajtojnë”.

Shkurte Hajdaraj, nëna e Ron Hajdaraj, i cili po shërohet në Klinikën Pediatrike në QKUK, nga një sëmundje malinje, e quajtur Medullapllastom ka thënë se djali i saj është diagnostifikuar në Tiranë, ndërsa pas operacionit terapinë ka ardhur ta vazhdoi në QKUK.

Ajo ka thënë për Kosovapress, se janë të kënaqur me trajtimin që iu bëhet nga mjekët, ndërsa ka thënë se që nga muaji qershor, kanë harxhuar rreth 10 mijë euro për blerjen e terapisë dhe barnave.

“Në QKUK, jemi prej nëntorit, ndërsa i sëmurë prej qershorit. Kushtet janë të mira, mirë na trajtojnë me mundësit që i kanë….Po na ka ra me shpenzuar….Ato që i kanë na ofrojnë por edhe ne i blejmë. Prej qershorit deri tani i kemi shpenzuar rreth 10 mijë euro”, ka thënë ajo.