Në Qendrën Klinike Universitare të Kosovës për gjashtë muaj janë kryer 610 koronarografi dhe 450 stentime, njofton zyra e drejtorit të Shërbimit Spitalor Klinik Universitar të Kosovës.

“Përkundër sfidave dhe vështirësive evidente, në Shërbimin e Kardiologjisë Invazive të Qendrës Klinike Universitare të Kosovës (QKUK) të Shërbimit Spitalor të Kosovës në gjashtëmujorin e parë të këtij viti janë kryer 610 koronarografi dhe 450 stentime dhe 300 balonime (PTCA),” thuhet në njoftim.

Njoftimi bën të ditur që kjo punë është kryer nga 7 specialistë të kardiologjisë invazive dhe 5 infermierë.

Sipas njoftimit, nga muaji shkurt kur u rregullua aparatura, në koronarografi është duke u punuar nga 12 orë.

Sipas QKUK-së nga parallogaritja e shërbimeve rezulton se janë kursyer rreth 2 milionë euro nga buxheti për referim të pacientëve jashtë institucioneve publike shëndetësore.

Me anë të koronarografisë zbulohen sëmundjet e enëve koronare, kur ato nuk mund të diagnostifikohen me aparatura tjera.