Real Madridi ka vendosur të mos i përfshijë disa yje, përfshirë këtu edhe Cristiano Ronaldon, në skuadrën prej 20 futbollistësh, e cila do ta zhvillojë turneun para-sezonal në SHBA.

Përfaqësuesi portugez kishte probleme fizike në fund të sezonit të kaluar dhe gjatë Botërorit, kështu që Los Blancos kanë vendosur që të mos i bëjnë presion yllit portugez, para sezonit të ri.

Ronaldo, i cili e realizoi vetëm një gol në tri paraqitjet që i pati në Botërorin e brazilit, mund të mungojë edhe në Superkupën e Evropës ndaj Sevillës në Cardiff më 12 gusht, ndërsa do të mundohet të jetë i gatshëm për fillimin e sezonit të ri në La Liga.

29 vjeçari nuk është i vetmi emër i madh që do të mungojë në turneun amerikan, pasi lista është e gjatë: Iker Casillas, Sergio Ramos, Raphael Varane, Marcelo, Luka Modric, Toni Kroos, Angel Di Maria, Sami Khedira e Karim Benzema.

Xabi Alonso, Pepe e Fabio Coentrao janë të vetmit lojtarë që u grumbulluan në skuadër e që ishin pjesë e Botërorit, ndërsa në SHBA udhëtuan edhe Diego Lopez, Dani Carvajal, Alvaro Arbeloa, Asier Illarramendi, Isco e Gareth Bale.

Reali do të luajë me Interin, Romën dhe Manchester Unitedin, në periudhën 27 korrik – 2 gusht.