Rinumërimi i votave mund të bëhet në QNR
Valmir Elezi i KQZ-së thotë se kërkesa për rinumërimin e votave në QNR ka për qëllim rritjen e transparencës dhe besimit të kandidatëve dhe votuesve në rezultatet zgjedhore.
Lajme
Komisioni Qendror i Zgjedhjeve po shqyrton mundësinë që rinumërimi i votave të zgjedhjeve nacionale të bëhet në Qendrën e Numërimit dhe Rezultateve.
Një kërkesë e tillë ka ardhur nga anëtarët e KQZ-së dhe pritet të shqyrtohet nga sekretariati në mbledhjen e radhës e cila pritet të mbahet të enjten apo premten, raporton Radio Kosova.
Zëdhënësi i KQZ-së, Valmir Elezi ka thënë se do të hartojnë një plan për shqyrtimin e kësaj kërkese.
Sipas tij, kjo ka për qëllim rritjen e transparencës, besimit të kandidatëve dhe votuesve në rezultatet zgjedhore.
“Tashmë ka mbet që Sekretariati i Komisionit Qendror të Zgjedhjeve të bëjë një plan, të shoh mundësitë e Qendrës së Numërimit dhe të Rezultateve, të shoh koston dhe detajet tjera, pastaj KQZ do të vendosë lidhur me këtë”, tha ai.