Policia e Kosovës ka arrestuar sot tre persona për “marrje ryshfeti” si dhe “keqpërdorim të pozitës zyrtare”, në mesin e tyre është edhe zëvendësministri i Zhvillimit Rajonal, Musa Cena.

Këtë e ka konfirmuar për lajmi.net Imer Beka, Kryeprokurori i Prokurorisë Themelore në Prishtinë.

“Mund të konfirmojë se me urdhër të prokurorit të rastit, Kujtim Munishi jam informuar se policia ka arrestuar zv/ministrin e Zhvillimit Rajonal, Musa Cena dhe dy të dyshuar tjerë për veprën penale ‘keqpërdorim të detyrës zyrtare’ dhe ‘marrje të ryshfetit’. Të dyshuarit janë ndaluar për 48 orë dhe ndaj të njëjtëve nesër vendoset a do të shkohet me kërkesë për caktim të paraburgimit si masë e sigurisë së prezencës së të dyshuarve në procedurë hetimore”, ka thënë Beka.

Edhe Policia e Kosovës ka konfirmuar për lajmi.net arrestimin e tre personave,  të dyshuar për “marrje ryshfeti” si dhe “keqpërdorim të pozitës zyrtare”.

“Policia e Kosovës pas ndërmarrjes se veprimeve hetimore, ka kryer arrestimin e tre personave të dyshuar të involvuar në veprat penale ‘Marrje e Ryshfetit’ dhe ‘Keqpërdorim i Pozitës apo autoritetit Zyrtar’ sipas kodit penal të Republikës së Kosovës. Te dyshuarit duke vepruar ne bashkryerje dyshohet se kane marrë ryshfet nga pala e dëmtuar”, ka thënë zëdhënësi i PK-së, Daut Hoxha për lajmi.net

Ministria  e Zhvillimit Rajonal është nën udhëheqjen e Rasim Demirit. /Lajmi.net/