Presidentja mbështet gratë në biznes
Presidentja e Republikës së Kosovës, Atifete Jahjaga, ka pritur të mërkurën në takim një delegacion të grave në biznes, fermere dhe aktiviste për të drejtat e gruas.
Lajme
Presidentja Jahjaga i ka përgëzuar gratë për punën e tyre të palodhshme dhe ka shprehur mbështetjen institucionale për zhvillimin e bizneseve të vogla dhe të mesme të cilat udhëhiqen nga gratë.
Ajo ka theksuar se prioritet i punës është fuqizimi ekonomik i gruas dhe se investimi në gruan është investim në familje dhe në të ardhmen e vendit, njofton komunikata e lëshuar nga Zyra e Presidencës.
“Gratë nga biznesi, gratë fermere dhe aktiviste për të drejtat e grave, e falënderuan presidenten Jahjaga për mbështetjen e vazhdueshme që ka treguar për respektimin e barazisë gjinore dhe për fuqizimin ekonomik të gruas në Kosovë”.
Sipas komunikatës, ato e njoftuan Presidenten edhe me punën e angazhimin e tyre, si dhe me sfidat me të cilat përballen.
Ndryshe, në takim ishin të pranishme Xhevrie Doroci nga “Pemtaria Doroci”; Lirije Haziri nga Shoqata “Vullneti i Grave” Vushtrri; Selvete Fetahu nga Shoqata ”Shpresa e Llapit” Podujevë; Sakibe Doli, Qendra për Mbrojtjen e Grave në Gjakovë; Nazife Jonuzi, Qendra për Mbrojtjen e Grave “Liria”, Gjilan; si dhe Tahire Haradinaj, blegtore nga Vushtrria.